NAGBAHAD ang buhatan sa Bureau of Fisheries and Aquatic Resources (BFAR)-Northern Mindanao nga ilang pasakaan og kaso ang masapon nga nanguha, namaligya ug nagdala sa taklobo kon giant clamshells dinhi sa rehiyon.
Gikumpirmar ni BFAR-Northern Mindanao director Allan Poquita nga ang manghilabot niining endangered species adunay dakong kasupakan sa Republic Act 10654, kon asa pugngan ug i-regulate ang ilegal nga pagpangisda nga giamendar sab sa Republic Act 8550, o Philippine Fisheries Code of 1998 kon asa ug ang pagkuha, pagdala ug pagbaligya niini dako kaayo nga ilegal.
Ang unang kasupakan adunay multa nga P5,000 ug ikaduhang kasupakan moabot ngadto sa usa ka milyon ug mapriso sulod sa walo ka tuig.
Migawas ang report nga paspas ang pagpanguha ug pagpamaligya og taklobo nga uwahing gika-report sa lungsod sa Magsaysay.
Gani aminado si Misamis Oriental Governor Bambi Emano nga miabot ang report kaniya nga ang mga dagkong taklobo diha sa Agutayan White Island ang giingong gisugdan og pangawat.
Sa pagkakaron, gimando nga hugot ang seguridad nga gipatuman sa mga coastal areas sa mga bantay dagat dinhi sa lalawigan.