GIHAWANAN ug gipangguba sa lokal nga kagamhanan sa dakbayan ang mga nakababag ug naka-okupar na sa mga sidewalks nga mga gambalay lakip na mga sakyanan sa J.R Borja Street, dakbayan sa Cagayan de Oro.
Ubay-ubay nga mga gambalay ang gipangguba ug gipang-isyuhan og tiket ang mga dagkong sakyanan nga gipangparada lang sa mga sidewalks.
Gibutyag ni Antonio Resma Jr., sa City Legal Office, nga padayon kini nga kalihokan base na sa kamandoan usab ni Presidente Rodrigo Duterte.
“Nakita nato nga naay bodega ang ilang truck nisulod siya sa 20 meters, gipang isyuhan na sa RTA sa ticket,” matud ni Resma.
Gidugang pa niini nga gisugdan sa JR Borja Extension ang maong clearing operation ug padayon na kini.
“Tuloy-tuloy na ni because kani nga order is in compliance with Presidente Duterte’s order sa SONA (State of the Nation Address),” dugang pa.
Kini giingong gitahasan ang lokal nga kagamhanan pinaagi sa memorandum gikan sa Department of Interior and Local Government (DILG).
Naghangyo usab kini sa kooperasiyon sa katawhan ilabi na nga ila na kining gipahimangnoan nga boluntaryong moguba sa ilang mga gambalay nga nakalapas na diha sa kadalanan.