NAPAIG ang lawas sa negusyanteng igsuon sa giilang drug lord sa siyudad sa Sugbo human sunuga ang iyang balay sa sitio Pilit, Barangay Babag 1, Dakbayan sa Sugbo pasado alas 3 Miyerkules sa kaadlawon, Septiyembre 25.
Ang biktima giila nga si Cary Llaguno, alyas Tangkag, giingong negusyog tubig sa downtown area sa Dakbayan sa Sugbo ug nahumig mga manok igtatari sa bukirang barangay.
Matod sa amahan sa kapuyo ni Cary nga si Sanny Loredo, kalit lang nangabot ang gibana-banang 30 ka armadong mga tawo sa ilang balay.
Nagdala ang mga gunman og tag-as nga kalibre sa armas.
Gihulagway usab ni Loredo sa interbyu sa mga tigbalita nga ang uban naka bullet proof vest.
Dunay ubang gunman nga nag-uniporme og sama sa sundawo, apan wa sila makaklaro kon unsay nakatatak.
Matod ni Loredo nga sa pag-abot sa mga armado nga pulos nagtabon sa ilang mga nawong, gimandoan usab sila sa pagtaptap sa ilang mga nawong ug mata dayong pangutana kon asa ang ilang mga armas.
Wa silay gikatug-an kay wa silay pusil.
Pipila ka gutlo ang nakalabay, gipagawas silang tanan sa balay samtang gipabilin sa sulod si Cary.
Sila gimandoan sa di pagsaba aron di apilon sa pagpusil.
Paglabay sa pipila ka minutos, unom ka sunod-sunod sa buto sa armas ang iyang nadungog nga gituohan niya nga si Cary na ang gipusil sa mga gunman.
Sa dihang padung na mobiya, ang mga gunman ningbubo og gasolina sa tibuok balay ug dayon gidagkotan kini sa usa sa mga armado.
Dalin nisilaob ang balay nga gama sa light materials.
“Ana tong usa nga gawas na mo kay molarga na ta. Nangutana asa ang manok ug asa ang agianan. Ako giingnan nga naa diha, Sir. Ayaw lang mog saba ha kay pang balikon tamo diri, pambalikon ta mog pamatyon,” kutlo ni Loredo sa sulti sa usa sa mga gunman.
Manok gidala
Sa pagkanaog sa mga armadong lalake gihapit pa ang mga hiniktang manok sa ubos nga gibana-bana niya nga mga 30 ka manok igtatari ang gikuha.
Ilang nalantawan nga dunay dalang mga sakyanan ang mga gunman nga gigamit sa pagsibat.
“Nagdala pa tog manok pag lakaw, Sir. Daghan to ilang dala,” matod sa silingan nga di magpaila.
Giangkon ni Loredo nga walay trabaho si Llaguno apan aduna kini negosyo nga tubigan ug farm nga gibana-bana adunay kapin sa 500 ka manok panabong.
Wala kini malambigit sa illegal nga drugas apan niadtong miaging semana, giingong adunay pulis nga ni-pick up niini ug gidala sa Camp Sotero Cabahug sa Cebu City Police Office.
Gibuhian ra usab kini tungod kay way ebidensya nga nalambigit kini sa illegal nga drugas.
Sakyanan gibiyaan
Pagka alas 8 sa buntag sa Miyerkules, ang sakyanan niini nga itom nga Nissan Navara nga adunay plate number FHZ 349 giabandonar sa sitio Maaslum, Barangay Busay.
Sigun ni Busay barangay tanod Richard Codizar nga adunay buto sa armas nga nadungog ang mga residente sa dapit, apan wa nay nakakita kon dunay mga tawo.
Nagtuo si Codizar nga konektado kini sa insidente sa Barangay Babag 1 diin gisunog ug gipatay si Cary.
Gisuwayan pa sa pagsunog ang sakyanan pinaagi sa pagduslit sa lingkuranan sa atubangan niini, apan wa ra makadako ang kayo.
Unang gikataho nga sakay sa maong sakyanan ang live in partner ni Llaguno nga si Girly Loredo ug na missing human gipusil.
Apan matod ni Police Executive Master Sergeant Jeffrey Larobis, imbestigador sa Mabolo Police Station, nga di missing si Girly. Wa hinuon siya mosulti kon hain si Girly.
Drugs
Drugas ang usa sa gitan-aw nga motibo sa insidente, matod ni Police Captain Dexter Basirgo, hepe sa Mabolo police station.
Matod ni Basirgo nga migawas na ang ngalan ni Cary nga nalambigit sa illegal nga drugas.
Niadtong miaging tuig, nitahan ni sa buhatan sa City Intelligence Branch sa CCPO aron magpa clear sa iyang ngalan human nisibaw nga nalambigit siya sa illegal nga drugas.
“Last year, ni surrender ni siya sa CIB pero dili ingon nga naapil iyang name sa na-involve sa drugs, kon dili mi-surrender siya to clear his name.Mao to gibuhian ra ni siya kay wala may ebidensya,” matod ni Basirgo.
Wa sad wad-a ang posibilidad nga personal ang motibo sa krimen nga mao karon ang ipasusi ni Basirgo sa iyang mga imbestigador.
Kay alang niya adunay dakong kasuko nga gihambin ang mga killer kang Cary tungod kay gipusil kini ug gisunog pa ang tibuok balay.
“Dako gyud sigurog kasuko ang mga suspek kay kon patyon ka, pusilon ra ka. Nganong gisunog pa man ang balay apil na siya,” matod ni Basirgo.
Giangkon hinuon ni Basirgo nga wa sa ilang listahan sa mga nalambigit sa illegal nga drugas si Cary.
Kini bisan pa kon aduna na silay nadawat nga impormasyon labot sa giingong kalambigitan niini sa pagpamaligya sa illegal nga drugas.
Ang igsuon ni Cary nga si Crisostomo gipusil patay niadtong Mayo 2010 samtang nangampanya kini sa eleksyon sa Barangay Lorega San Miguel.
Ang gitumbok nga gunman nasikop apan ang utok wa mailhi hangtod karon.
Si Crisostomo nidagan isip independente pagkakonsehal sa Dakbayan sa Sugbo.