CELLPHONE sa negosyante nga gibanhigan-patay sa riding-in-tandem sa Juan Luna Ave., Mabolo, dakbayan sa Sugbo niadtong Dominggo sa gabii, Septiyembre 22, gibuksan na sa mga imbestigador ug nasuta nga duha na ka persons of interest ang ilang gitan-aw sa pagkakaron.
Matod ni Police Captain Dexter Basirgo, hepe sa Mabolo Police Station, nga nasubay na nila kinsa ang gika hinabi sa telepono ni Jeffrey Gomonit sa wala pa mahitabo ang pagpamanhig.
Adunay duha ka pangalan karon ang gitumbok nga persons of interest diin ang duha pulos kasusyo sa negosyo ni Gomonit sa paghakot sa yuta gikan sa mga construction site.
“Ang cellphone na open na nato nya nasubay na nato ang communication kon kinsay last person nga iyang gika estorya, katong duha ka business partner niya nga mao sab ang atong persons of interest.” matod ni Basirgo.
Adunay dakong utang ang maong mga business partner ni Gomonit nga matod pa, kanunay nga singilon sa biktima apan kanunay usab kini nga mobalibad.
Giingong mibayad og cheke ang business partner sa biktima apan niuntol kini nga gikasuko pag-ayo ni Gomonit.
“Ang usa sa ka sosyo nya adunay dakong utang sa biktima basin nairita kay gisigihan pagpaningil kay ang naa sa tenor sa communication sa cellphone kay paningil man nya ang usa ni issue og cheke nga talbog,” dugang ni Basirgo.
Nagtuo si Basirgo nga nasayod na ang duha ka business partner ni Gomonit nga sila ang gitumbok nga persons of interest tungod kay sila ang katapusang naka uban niini nianang gabii sa wala pa gibanhigan patay ang biktima.
Gisigihan nilag tawag sa telepono ang duha ka persons of interest aron mapaubos sila sa imbestigasyon apan giingong dili na kini motubag.
Gihulagway ni Basirgo nga mga dayo usab dinhi sa Sugbo ang mga negosyante ug matod pa gikan ra usab kini sa Mindanao nga mibalhin dinhi aron magnegusyo.
Kon magpadayon nga mag dumili ang maong mga personalidad sa pagsanong sa ilang pagpatawag alang sa imbestigasyon, mohipus na silag mga ebedensya batok kanila alang sa pagpasaka na sa kaso ngadto sa korte. (AYB)