DUGAY na si Ingko Omeng nangandoy nga moabot kaniya ang suwerte sa kinabuhi, apan hangtod karon nga tiguwang na siya ug anaa na sa kahapunon sa kinabuhi nag-antos lang gihapon siya sa kakabos. Ulitawong guwang siya ug hilig mopusta sa ‘lottery’ ug uban pang mga matang sa sugal nga gitawag og ‘game of chance.’ Mopusta siya sa buwang sa mga manok, labi na sa ‘derby’ ug sa ginagmay nga tari sa mga manok, sama sa tigbakay sa ilang balangay.
“Ingko Omeng, kapila ka na kadaog sa swertres?” nangutana si Igong, batan-on niyang silingan nga mag-anhaan sa iyang payag kay ganahan man kining maminaw sa mga sugilanon nga iyang isugid bahin sa kaagi mga hari, prinsipe ug prinsesa sa karaang panahon. Wala niya panumbalinga ang pangutana ni Igong.
Kaniadto sa batan-on pa si Ingko Omeng hilig siyang magsuwat-suwat, apan wala kini molungtad. Pakyas siya kay kanunay mang iuli ang gipadala niyang balak ug sugilanon sa mantalaang mopatik og mga sinulat nga may hanig sa kultura ug literatura. Usa siya ka ‘frustrated literary writer.’
Karong hapuna nia siya sa bungtod, sa bag-o niyang gitukod nga payag. Mibalhin siya dinhi kay di na siya ganahang makigsagol sa mga molupyo didto sa patag. Bisan og wala siya makadungog nga siya gisaway o giyubitan, masabot man sa ilang pahiyom, labi na nga pobre siya hangtod karon. Pero, malingaw man siya sa iyang kinabuhi tungod sa usa ka binuhat nga maoy naghatag og inspirasyon sa iyang kinabuhi, si Malang. Si Malang dalagang guwang nga dunay tunga sa ektaryang luna nga gitamnan og mga kamunggay. Kuwartahan si Malang ug matag hapon anhaon siya sa dalagang guwang. Mao bitaw nga dihang gidaygan niya kini sa mga pulong nga ‘Gihigugma ko ikaw!’ dihay gilaw sa mga mata ni Malang nga daw gilaw sa nagpahiping bituon sa langit.
“Ikaw gyud, Omeng, no, joker ka kaayo! Mga tiguwang na ta, uy! Di na ta angay anang gugma-gugma,” matod ni Malang nga nagpahiyom.
“Ang gibati kong gugma alang nimo, Lang, di joke o tiaw-tiaw, uy! Tinuod man gyud ni ba!” ni Ingko Omeng nga mitutok kang Malang. Mao kadto ang unang higayon nga gidaygan ni Ingko Omeng si Malang sa iyang gibati.
Ug karon sa ikaduhang higayon gisubli niya pagpadayag kang Malang sa iyang gugma.
“Basin og gibinuangan lang ko nimo, Omeng!” ni Malang.
“Binuangan tika? Uy, di na mahitabo, Malang, kay para nako nga usa ka demalason nga tawo, ikaw ang naghatag og inspirasyon ning ako karong kalibutan,” ni Ingko Omeng. Gikuptan niya ang kamot ni Malang nga wala masuko samtang nagpahiyom.
KARONG hapuna sila si Ingko Omeng ug si Malang nanguhag mga pal-ak ug dahon sa kamunggay. Ila kining isayo og tumod sa suki nilag tindahan sa merkado inigka ugma. Diha si Igong nga maoy tigsulod sa sako sa nasapli nilang mga pal-ak sa kamunggay.
“Ingko Omeng, tiwasa unya tong wa nimo mahuman nga estorya, ha, bahin sa usa ka tiguwang prinsipe nga nakakaplag og tiguwang nga prinsesa,” kusog nga tingog ni Igong. “Nagkadayon ba to sila?”
Didto sa kasingkasing ni Ingko Omeng may pagbati nga migahom sa iyang tibuok galamhan. Naamguhan na lamang niya ang iyang kaugalingon nga migakos kang Malang kansang mga mata migilaw, daw pahiyom sa usa ka bituong nagpahipi didto sa langit. May gugma nga miturok sa kasingkasing nilang Ingko Omeng sa kahapunon sa ilang kinabuhi. (KATAPUSAN)