DEAR Noy Kulas,
Maayo adlaw kanimo. Nia magpatambag kanimo kay naglisod ug naglibog ko sa akong problema diri sa gawas.
Minyo ko ug dunay mga anak. Sa kadugay nako diri sa trabaho sa abroad, naa na koy nasuod nga mga tawo, apil na niini mga babaye. Di baya malikayan nga pareho nako, mangita og outlet sa kamingaw. Usa ani mao si Sandra nga pareho nako minyo pud, dunay bana ug mga anak nga nahabilin diha pero taga Luzon siya.
Moangkon ko nga nagpuyo na mi diri sa abroad nga sama og magtiayon kay sayon ra sa among gitrabahoan nga country, way restrictions. Naglikay lang mi nga makaanak pinaagi sa mga precautions. Mga upat ka tuig na mi nga nagpuyo nga wa makahibawo ang among tagsa ka pamilya kay walang pakialamay diri.
But karon naproblema ko sa akong pagbalik diri kay ang akong asawa nisekreto sa pag-apply og work sa lugar diin ko nagtrabaho. Nadawat siya sa work ug in two months naa na siya diri. Unsa may among buhaton, Noy Kulas, nga love na man namo sa usag usa ni Sandra after living for years? Ako na siyang gipahibawo ug naguol siya og maayo. Plano unta niya nga mo-file og annulment sa kasal nila sa iyang bana kay iresponsable ni. Noy, please lamdagi akong huna-huna.
FRED
Fred,
Di tanang maanindot mohangtod kay duna may mga limitasyon. Niabot na ang panahon nga maputol na ang inyong dugay nang tinagoan. Di na hinuon angay kahibudngan kay daghan na diha sa gawas. Example lang kadtong bana nga letter sender.
Pangutan-a ang imong kaugalingon kon ready ka bang mobiya sa imong pamilya nga maoy imong gisakripisyuhan pag-anha diha sa abroad. Duna ka bay bug-at nga rason nga imo man silang biyaan? Sa imong pagsulod sa mao nga relasyon imo usab unta kining gihinuktokan og maayo.
If it is not worth it, nga maoy akong tan-aw, pagbuwag na lang mo kay sa inyo nang ipadayon nga hayan mosangko nga masakpan mo sa imong kapuyo, modako na ang gubot. Makasabot na siya kay utro baya sab siyang minyo. Di usab na siya magmahay nimo kay in the first place, nakahibawo na siya daan sa imong estado ug sa inyoha. Bisan unsaon pa, minyo mong duha.
NOY KULAS