Barrita: Hazing ban wa kapugong sa hazing

GIAMENDAHAN sa Kongreso ang Republic Act (RA) No. 8049, ang Anti-Hazing Act of 1995, human mapatay sa hazing si Horacio “Atio” Castillo III, usa ka first year law student sa University of Santo Tomas, niadtong Septyembre 17, 2017.

Gipasar sa miaging tuig ang RA No. 11053, ang Anti-Hazing Act of 2018, nga nagmando sa total ban, sa hingpit nga pagdili, sa hazing, ug nagpahamtang sa mas bug-at nga silot niadtong mga organizers ug participants sa hazing.

Ang Section 3 sa maong balaod nagkanayon, “All forms of hazing shall be prohibited in fraternities, sororities, and organizations in schools, including citizens’ military training and citizens’ army training.”

Ang total hazing ban naglakip sa mga non-school-based fraternities, sororities ug organizations. Ang mga school-based organizations kinahanglang mananghid kon dunay pagahimuon nga initiation rites, lakip sa mga ngan sa moapil niini.

Kon ang hazing moresulta sa kamatayon, pagpanglugos, sodomy o mutilation, kadtong nagplano ug nisalmot sa hazing pahamtangan sa silot nga reclusion perpetua o pagkpariso hangtod sa 40 ka tuig ug multa nga P3 milyones.

Ang hazing nga di moresulta sa unahan pagasilotan gihapon sa reclusion perpetua ug multa nga P2 milyunes. Di sila makalingkawas bisan kon dunay waiver kay ilhon kining “void and without any binding effect on the parties.”

Si Senador Panfilo Lacson naglaum nga tungod sa maong balaod di na mausab pa ang nahitabo kang Castillo. Apan nakapugong ba ang total hazing ban sa laing kamatayon pinaagi sa hazing?

Usa ka kadete sa Philippine Military Academy (PMA) sa syudad sa Baguio ang gikatahong napatay niadtong Septyembre 18, 2019 gumikan sa hazing. Gikonpirmar sa kapulisan sa Baguio City nga si Cadet 4th Class Darwin Dormitorio, 20-anyos nga taga Cagayan de Oro City, namatay tungod sa “blunt force trauma” gumikan sa hazing.

Giimbestigar pa sa PMA ug sa kapulisan kon si kinsa ang mga nalambigit sa maong hazing sa PMA. Apan tataw kaayo nga bisan pa kon gipatuman na ang total hazing ban, wa gihapon kini makapugong sa hazing.

Matod pa ni Senador Lacson, usa ka PMA graduate ug kanhi hepe sa PNP, nagpadayon ang hazing sa PMA bisan pa sa anti-hazing law. “They never learn. Hazing is as old a practice as far as we can remember,” matod pa niya.

Kadtong nahilambigit sa hazing mawad-an sab sa ilang mga opurtunidad sa kinabuhi. “Those possibly responsible for the death of Dormitorio are now surely regretting what they did. It is too late for them though and they will have to face the consequence of their indiscretions,” matod pa ni Lacson. (edbarrita@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph