GISAAD ni Cebu City Mayor Edgardo Labella ang pagtanum og tres milyones ka mga kahoy dinhi sa dakbayan sa Sugbo sulod sa tulo ka tuig niyang termino. Buot ipasabot nga usa ka milyon ka punuan sa kahoy matag tuig.
Kini aron makatabang sa atong kalikupan labi na sa pagpugong sa mga baha ug landslide. Usa sa mga hinungdan nga mahitabo kining maong matang sa mga katalagman gumikan kay na-upaw na ang atong labukiran. Wala nay gamot sa mga kahoy nga makapugong sa pagdahili sa yuta.
Wala hinuon gibutyag ni Mayor Labella kon asa ipananom kining maong mga kahoy. Ug unsa ang mga pamaagi sa pagtanum niini. Kada-semana o kada-buwan pa kitang mananum aron atong makab-ot kining maong gidaghanon sa mga punuan sa kahoy? Ato bang i-apil ang mga lumolupyo o ang mga kawani lang sa balay lungsod?
Walay problema kay ako mismo suportado ning maong lakang. Gani daghan naman mga ahensiya sa kagamhanan o mga pribadong kompaniya ang mihimo ning maong adbokasiya. Niadtong ako pa ang chairman sa Kapisanan ng mga Brodkaster ng Pilipinas (KBP) Cebu Chapter, usa kini sa akong programa. Sulod sa pipila ka mga panahon nagpahigayon ang KBP og susamang kalihukan sa kabukiran sa Cantipla ning dakbayan.
Pero ang pangutana, ato ba kining masustinihan? Ug kutob ba lang ta sa pagpananum? Kinsa man ang mo-amoma niini aron gyud motubo ug molipang kini? Tumong ba ni Mayor Labella nga magmugna kita og lasang? Di kaha mahisama sa gihimo sa Department of Environment and Natural Resources (DENR) nga kutob lang sa ‘greening’ ug inig ka dagko, pamutlon lang aron himoon nga uling? Nganong gihimo man kini sa nasudnong kagamhanan? Aron lang gyud ma-justify ang paggamit sa pundo? Kay kon wala nay tree planting, maglisod man sila sa pagpagawas og pundo. Unya kinsa man ang mobantay aron dili mapanastamasan sa uban sama sa mga ka-ingero? Naa man gani mga kahoy diha sa Kapitolyo, nganong gipamutol man na? Kinsa man ang nagtugot niana nga pamutlon kanang mga kahoya?
(bobbygnalzaro@gmail.com)