MGA duwa karon:
5:15 pm- DBTC batok USC (High School)
6:45 pm- UV batok SWU (College)
Malab-as og balik ang panagribal sa Southwestern University (SWU)-Phinma Cobras ug defending champions University of the Visayas (UV) Green Lancers sa ilang panagharong sa main game karong gabii sa Cebu Schools Athletic Foundation Inc. (CESAFI) basketball college division sa Cebu Coliseum.
Mao kini ang labing unang panag-engkuwentro sa duha ka mga kampo gikan sa ilang panagharong sa finals best-of-three series sa Partner’s Cup diin surpresang gisiruhan sa Cobras ang Green Lancers, 2-0.
Human sa dakong kalampusan sa Cobras sa Partner’s Cup, nga maoy pre-season event sa CESAFI, gikonsiderar na sila nga usa sa labing inilog nga mopatigbabaw sa regular season.
Tuod man, nabarugan kini sa Cobras ug kasamtangan silang nag-una sa standing dala ang 3-0 nga rekord.
Ang mga gipangtikma sa Cobras mao ang University of Cebu (UC) Webmasters, 65-58, University of Southern Philippines Foundation (USPF) Panthers, 86-66, ug University of San Carlos (USC) Warriors, 62-59.
Nagkanayon si Cobras coach Mike Reyes nga kon gusto sa iyang mga batos nga mopatigbabaw og balik batok sa Green Lancers, gikinahanglan ang pagtibangay sa usa’g usa.
“We have to continue helping each other in all aspects of the game,” matod ni Reyes sa interbyu sa Sun.Star Cebu, igsuong buhatan ning mantalaan.
Sama sa naandan, ang Cobras magsalig og maayo nila ni William Polican, Red Cachuela, Dyll Roncal, Shaquille Imperial ug Senegalese wingman Lamine Thiam.
Sa ilang bahin, ang Green Lancers kasamtangang naa sa ikaduhang dapit nga nagbitbit og 3-1 nga rekord.
Gisugdan sa Green Lancers ang ilang kampanya pinaagi sa pagmakmak sa Warriors, 74-53.
Apan human niini, nakatilaw og makapakaging nga kapildihan ang Green Lancers batok sa Webmasters, 64-72.
Sa nagsunod nilang duha ka mga tahas, ang Green Lancers namungot sa Cebu Institute of Technology University (CITU) Wildcats, 105-65, ug University of San Jose Recoletos (USJ-R) Jaguars, 76-56.
Sama sa naandan, ang Green Lancers ni coach Gary Cortes magsalig og maayo sa beterano nilang pointguard nga si Gileant Delator.
Sa laing bahin, magsangka sa premirong duwa ang Don Bosco Technological Center (DBTC) Greywolves ug USC Baby Warriors alang sa high school division.
Ang duha ka mga kampo parehong naggunit og 1-2 nga rekord. (ESL)