WA GILAYON mag-usik og panahon si KJ Mcdaniels sa pagpakita og igong katakos aron agakon ang TNT Katropa ngadto sa 135-107 nga demolisyon sa Blackwater, kagabii sa PBA Governors’ Cup at the Smart-Araneta Coliseum.
Si McDaniels mipabaha og 41 puntos ug 22 ka rebounds sa iyang unang duwa sa PBA ug ang Katropa yanong mirehistro sa dakong kadaugan sa ilang unang duwa sa conference.
Ang kanhi sakop sa Houston Rockets sa NBA mitali og 13 puntos sa first quarter aron pangulohan ang Katropa ngadto sa 34-19 nga labaw sa unang period ug wala na gyud kini molingi pa.
Si Bobby Ray Parks Jr. mitali usab og 39 puntos alang sa pildirong Elite.
“We are happy with the win but defensively, we can’t afford to give over a hundred points,” matod ni TNT coach Bong Ravena nga nakutloan sa Spin.ph. “Ang goal namin is dumepensa, make stops, at walang easy lay-ups. Still trying to work on our defense especially with our new guys.”
Giablihan sa Katropa og 6-0 nga rally sa sayong bahin diin upat niin gikan ni McDaniels ug laing 9-0 run nga maoy nagbingat sa labaw.
Si RR Pogoy mipupo og 22 puntos samtang midugang og 18 si Troy Rosario alang sa KaTropa.
Sa habig sa Blackwater, si Allein Maliksi nakatampo og 15 puntos ug 14 puntos gikan usab kang Roi Sumang. (JBM)