GIPAHIBAWO sa National Housing Authority (NHA) 7 nga kon anaa na sa 15-20% sa accomplishment ang land developer alang sa Naga Permanent Housing Project, magsugod na usab sila pagtukod sa mga panimalay alang sa mga residente niadtong biktima sa pagdahili sa yuta sa maong dapit.
Ang Housing and Land Use Regulatory Board (HLURB) nga maoy gitahasan nga mangulo sa land development sa maong dapit, gi-award kini ngadto sa Red Land, nga nagsugod na pagbutang sa ilahang mga ekipo aron Oktubre makasugod na kini.
Matod ni Engr. Constancio Antiniero, ang officer-in-charge sa Cebu District Office sa NHA 7, nga posibleng sa uwahing semana sa buwan sa Oktubre sila makasugod og tukod sa 192 ka mga panimalay.
Dungan niini nga nasulod pa sila sa ilang target ug nipahibawo usab kini nga anaa sa 200 calendar days nila humanon ang tanang panimalay sukad sa pagsugod nila sa katukoran niini.
Ang Kit Properties Inc., nga usa ka Cebuano-based property developer mao ang motrabaho sa P90 milyones nga kantidad sa proyekto.
Matod ni Antiniero nga matag usa ka unit nagkatidad kini og P450,000.
Moabot usab sa 40 square meters ang gilapdon sa luna nga tukoran sa ilang tagsa-tagsa ka mga panimalay.
Tukoron ang maong mga panimalay sa 2-ektarya nga bahin sa Bilili Property sa Barangay Tinaan, Naga City.
Si Presidente Rodrigo Duterte mismo ang usa sa nangulo sa groundbreaking sa maong housing project diin gihimo kini niya nga libre alang sa tanang 213 ka mga pamilya.
Septiyembre 20 niadtong 2018 dihang nahitabo ang trahedya sa pagdahili sa yuta sa Sitio Sindulan sa Barangay Tinaan diin niabot sa 60 ka panimalay ang nalubong human nihumok ang yuta tungod sa quarry ug kusog nga uwan. (HBL)