GIKATAKDA nga mahuman karong tuiga ang 7,493 ka mga housing unit nga gitukod sa National Housing Authority (NHA) 7 isip hinabang alang sa mga biktima sa bagyong Yolanda niadtong 2013.
Ang rason sa NHA nga nadugay kini paghuman, tungod sa mga rekisitos nga gikinahanglan susama sa Environmental Compliance Certificate sa luna nga tukoran sa panimalay.
Sa maong gidaghanon, niabot na sa 6,295 ang na kompleto na; 495 ang partially completed o kining 50-75% na ang nahuman sa konstruksyon niini; samtang ang nahabiling 703 ka units, gihulagway na kining substantially completed o kining 76-95% nang nahuman.
Matod ni Engr. Constancio Antiniero ang officer-in-charge sa Cebu District Office sa NHA 7, nga bisan paman og target nila nga mahuman na kini karong tuiga, apan 33% pa lang sa maong mga housing units o kapin sa 1,500 ang nabalhinan sa mga apektadong mga pamilya tungod walay koneksyon sa tubig.
Ang maong mga housing projects mao kini ang Olivo Heights sa lungsod sa Tabuelan; Maya Park Homes sa Bantayan; Sto. Niño Homes sa Sta. Fe; Balay Bantayan 1 sa Daanbantayan; North View Park Homes 1 sa Medellin.
Green Heights 1 ug 2, ug Lanao Unity Park Homes sa Daanbantayan; Villa Mercedes 1 ug 2 sa Bantayan; St. Francis Park Homes 1 sa Madredeijos; North View Park Homes 2 sa Medellin; Lantawan Homes sa Tuburan; Seawoods residences sa Tabogon; ug San Remigio Heights sa San Remigio.
Kining mga proyekto, una palang kini sa 37 ka proyekto sa NHA sa 'Yolanda' victims.
Ang 24 nga housing projects niini gitrabaho pa ang land development niini ug gikatakda nga mahuman sa tuig 2020.
Tanang proyekto libre kini nga ihatag sa NHA ug walay counterpart sa beneficiaries.
Gipahibawo hinuon ni Antiniero nga sulod sa 20 ka tuig, dili pa ma-transfer sa beneficiary ang titulo sa balay ug dili pa usab niini makapahimulos sa ubang housing unit projects sa gobyerno. (HBL)