DUL-AN na sa 11,000 ka mga malapason sa trapiko ang nasikop sa duha ug tunga pa lang ka buwan nga pagpatuman sa lagda sa trapiko sa Siyudad sa Talisay.
Sukad sa Hulyo 1, hangtud sa Septiyembre 15, nitala na ang City of Talisay Traffic Operation and Development Authority (CT-TODA) og 10, 679 ka mga naisyuhan og ticket tungod sa wa pagsunod sa traffic laws.
Diin ang pinakadaku nga bahin mao kadtong mga nakalapas sa ‘no helmet policy nga niabot og 2,360.
Kahinumduman nga sa ikaduhang semana, human sa paglingkud ni Mayor Gerald Anthony Gullas, Jr. niadtong Hunyo 30, gisugdan ang estrikto nga pagpatuman sa balaud kalabot sa pagsul-ob og helmet sa drayber ug sa pasahero sa motorsiklo.
Ikaduha nga adunay labing daghan nga violators mao ang wala pagsunod sa road sign, ilabi na ang 'no right o left turn', diin 1,548 na ang naisyuhan og citation tungod niini.
Samtang 1,309 usab ka mga drayber ang naisyuhan og citation sa kalapasan tungod sa obstruction.
Nihimo og pag-tally ang CT-TODA aron pagsuta kon nagmatngon na ba ang mga motorista.
Hinuon matod sa mayor nga ilang nabantayan nga nagka-menus na ang mga malapason.
Niadtong Hulyo adunay 4,125 nga natala, sa Agusto nisaka kini, diin niabot og 4,619. Kini human nga sa Agusto estrikto gipatuman ang dili pagtsinelas samtang nagmaneho. Wala na usab pasaylua ang mga nagdala og expire nga registration ug ang estrikto nga pagdili sa pagparada sa daplin sa dan.
Sa Septiyembre sa tunga pa lang sa buwan niini, nitala na lang og 1,935.
Sa maong mga nakalapas, giklaro sa CT-TODA nga walay pinili, gani dul-an usab sa napulo sa nadakpan nga mga sakyanan iya sa gobyerno, sakyanan nga gipanag-iya sa kawani sa gobyerno ug bisan na sa opisyal.
Matud ni Tumulak, nga kasagaran sa mga nakalapas dili Talisaynon, kadtong mga niagi lang, hinungdan nga ilang hangyo ug panawagan karon nga tininuod ang ilang pagpatuman sa balaud, ug nga unta respetuan ug tahuron usab kini sa tanan.
“Kon naa man gyuy ipatuman kita gyud ang mopasabot sa tawo ug maximum tolerance lang gyud ta. Kita man naa sa gobyerno, dili ta mag-inisog, kitay tarong nga moestorya sa katawhan,” saysay ni Gullas sa Superbalita Cebu.
“Atong advice sa motorist, nga total ang hugot nga pagpatuman sa lagda sa trapiko alang man lang sa kaayuhan sa tanan, mangayo lang mi sa ilang pagsabot, ug nga palihug tumana lang ang atong balaud,” hangyo ni Tumulaksa publiko nga molabay sa Talisay. (FMD)