Nakapahimus sa GCTA gipatay; motibo hayan panimawos: Pulis

PAGPANIMAWOS maoy posibleng motibo sa pagpatay sa convict nga giingong nakapahimus sa Good Conduct Time Allowance (GCTA) Law.

Si Francis Vinluan, 43, gipusil patay sa nag-inusarang gunman Martes sa gabii, Septiyembre 24, sa dan MJ Cuenco duol sa Ayala Access Road sa Barangay Mabolo, Siyudad sa Sugbo. Si Vinluan taga Barangay Yati, Liloan.

Si P/Capt. Dexter Basirgo, hepe sa Mabolo Police Station nga nahinabi sa Superbalita Cebu, niingon nga wa pa silay matumbok dayon nga motibo sa ilang imbestigasyon, apan wa niya wagtanga ang panimawos, labina kay murder ang kaso ni Vinluan 14 ka tuig na ang nakalabay.

Matod niya nga hayan gibaslan si Vinluan, apan iyang gitataw nga ila pa kining susihon. Laing gitan-aw nila mao ang kalambigitan niini sa illegal drugs.

“Before ana pagka hitabo the other month pa lang, nakadungog tag report gikan sa mga barangay officials sa Mabolo, a certain Kiko, nga who is selling illegal drugs sa may area sa Ayala Access Road. Wa mi kahibawo nga kini Francisco ug si Kiko is the same person,," matod ni Basirgo.

Si Vinluan napriso sa kasong murder ug gitanggong sa Sablayan Prison and Penal Farm sa Occidental Mindoro sulod sa 14 ka mga tuig.

Gisilutan siyang mabilanggo og 20 ngadto sa 40 ka tuig.

Matod sa igsuon ni Vinluan nga si Dax, nakagawas kini niadtong Agusto 7, 2019 tungod sa pagkaapil niya sa mga nakabenipisyo sa GCTA. Ang release order gipirmahan ni kanhi Bureau of Corrections (BuCor) chief Nicanor Faeldon.

Si Presidente Rodrigo Duterte nimando sa mga kombiktado sa pagtahan kon sila nakapahimus sa GCTA.

Gitagalan niya ang 1,914 ka mga kombiktado hangtod sa Septiyembre 19 sa pagtahan.

Sa pagsubay sa kapulisan sa dapit nga nahitaboan sa krimen, ilang nasayran nga si Vinluan isog ug gikahadlukan sa mga tawo sa dapit.

Si Vinluan pabalik na unta sa dan Gil Tudtud sa Sitio Estacion, Mabolo dihang gisundan sa nag-inusarang gunman nga nagmotorsiklo.

Duna siyay mga samad pinusilan sa ulo ug lawas.

Sa paghiling sa personnel sa Scene of the Crime Operations (SOCO) duna silay nakuhang P7,000 cash sa bulsa, cellphone ug duha ka medium nga gidak-on sa putos sa gituohang shabu nga nitimbang og 8 gramos balor og P47,000. (BBT)