GISANONG sa Mactan-Cebu Bridge Management Board (MCBMB) ang hangyo ni Lapu-Lapu City Mayor Junard “Ahong” Chan nga di na lang ihinayon ang mga plano niining mga lagda sa duha ka Mactan bridges.
Kini nakab-ot atol sa gipahigayong special board meeting sa MCBMB nga gipangulohan ni Governor Gwendolyn Garcia niadtong Martes sa hapon, Septiyembre 24.
Una, mao ang pagpatuman unta og one-way traffic alang sa mga pedestrian sa unang Mactan-Mandaue Bridge aron di magsugat ang mga pedestrian nga moresulta sa posibleng disgrasya.
Sa mao untang lagda, giingong mahimo lang makaagi ang mga pedestrian sa habig sa wala kon mopaingon sila sa ilang destinasyon sa Lapu-Lapu o Mandaue nga habig.
Apan gisugyot ni Chan nga mas maayong di lang kini ipatuman sanglit mahasol na ang mga tinun-an nga magbaktas sa taytayan pinaagi sa pag labang-labang.
Mas maayong dili na lang pugngan ang mga pedestrian kon asa sila mas komportable moagi nga habig sa taytayan.
Ikaduhang hangyo ni Chan nga gisanong sa MCBMB nga di ipatuman curfew sa taytayan gikan sa ala 1 sa kadlawon hangtod sa alas 5 alang niadtong di magsakyanan.
Kini gumikan kay alang ni Chan alaot ang ubang mopauli gikan sa trabaho anang mga orasa nga maglakaw o magbiseklita hilabi na sa way ikaplete o masakyan.
Ikatulong gisanong sa MCBMB mao ang pagpaagi na sa mga mag biseklita sa duha ka taytayan apan guroyon lang inay sakyan aron kalikayan ang disgrasya.
Wa na usay limit sa oras ang pag-agi sa magbiseklita sa taytayan basta mosunod lang sa pagguroy niini agi sa pedestrian lane.
Subay sa pagsanong, nipasalig usab si Chan sa pagbutang og kapulisan, traffic enforcer ug mga tanod sa taytayan 24/7 aron kalikayan ang mga adunay planong molayat sa taytayan.
Gibutyag ni Chan nga subay sa mando sa Land Transportation Office (LTO) 7 planong tagaan og awtoridad ang mga traffic personnel ug kapulisan sa pag-isyu og citation ticket sa mga magbiseklita nga moagi sa taytayan nga dili moguroy niini gumikan kay kalapasan kini sa balaod mahitungod sa pagbiseklita sa mga taytayan.
“Katong adunay mga bicycle enthusiast nga gustong moapelar ana, adto lang sila sa bridge board,” matod ni Chan.