NIPABURAK si Edmund Cambaliza og kinatibuk-ang 630 pinfalls human ang tulo ka mga duwa aron nga motigbabaw nga Datba weekly champion sa SM Lanang Premier Bowling Center, Martes sa gabii, Septyembre 24, sa Lanang, Davao City.
Si Arthur John Galendez nisungkit sab sa runner-up honors human miigo og 623 pinfalls sa bowlfest nga gipasiugdahan sa Davao Tenpin Bowlers Association (Datba) isip qualifying alang sa monthly finals.
Sila si Cambaliza ug Galendez niuli nga dunay ganting salapi nga P900 ug P500, sa maong han-ay.
Si Art Galendez nisunod sa ikatulong puwesto, nipaligit og 614 pins, sa torneyo nga nidapit og 15 ka magduduwa.
Samtang, si Rod Tongo nanguna sa Datba Weekly Tournament nga gihimo niadtong Sabado sa gabii, Septyembre 21. Nitigum siya og 597 pinfalls human ang tulo ka mga duwa samtang si Cambaliza niiskor og 571 aron nga mahuman sa ikaduhang puwesto ug si Joshua Disuacido niigo og 560 nahimutang sa ikatulong puwesto.
Sa Desperados Tournament nga gihimo niadtong Septyembre 21, si Arthur Galendez mitigum og 1,123 pinfalls human ang unom ka mga duwa aron nga angkunon ang titulo batok kanila ni Crystal Chavez (1,118) ug Virgilio Magdale (1,112) kinsa niangkon sa sunod nga duha ka mga puwesto.
Ang matag semana nga mga duwa mobalik sa Sabado. (MLSA)