ATONG nadungog sa pila ka higayon gikan sa baba ni President Rodrigo Duterte nga maayo pang ipanghatag sa mga yanong katawhan ang kwarta sa gobyerno kay kawaton ra sa mga tawo nga naa sa gobyerno.
Daw nawad-an sa paglaum si President Digong nga iyang mapakgang ang kurapsyon kay mikuyanap na ang kagaw halos sa tanang buhatan sa gobyerno, pulos na kurap.
Gibantog ang buhatan sa Department of Public Works and Highway (DPWH), Bureau of Customs (BOC) Department of Education (DepEd), Bureau of Internal Revenue (BIR) ug daghan pang buhatan sa gobyerno nga kurap. Halos tanan panguwarta na ang gihunahuna ug napadaplin na ang pagserbisyo sa katawhan.
Luyo sa mga bahad ug pasidaan ni Digong naghitak gihapon ang kurapsyon. Nag-una sa hunahuna sa kadaghanan ang pagtigom sa daghang kwarta ug nangapil sa investment schemes kay nagdahom nga daw napingwit nga mipaon og wati unya mokubit ang isda.
Daghan ang nahaylo sa sinagko nga tubo sa ilang kwarta nga moabot sa 300 porsiyento ang mobalik kon mag-invest apan sa kalit nahanaw.
Sa milabay nga semana gisikop sa mga sakop sa National Bureau of Investigation si Digos City 2nd District board member Arvin Malaza, a.k.a Jun Blanco kay luyo sa pahimangno sa Securities and Exchange Commission (SEC) human gipasirad-an ang Kapa International Ministry, nagpadayon sa pay-in ang pipila nga wa pa matagam didto sa istasyon sa radio sa Digos City.
Nangulipas pa nga wa kuno siya’y kalabutan sa operasyon sa Kapa kay miundang na siya.
Pinili siya nga opisyal sa gobyerno sa probinsya sa Davao del Sur apan inay motabang pagpatuman sa mandu sa SEC ug sa Department of Interior and Local Government nangulo naman hinuon sa pagpabadlong.
Karong semanaha nahimong sumsuman sa katawhan sa barberohan ug sa tubaan ang pakamatay ug pagka-ospital sa mga kadete sa Philippine Military Academy tungod sa hazing.
Sayang ang kinabuhi sa mga batan-on nga gusto unta mosilbi sa nasud apan gipasagdan sa mga pangulo nga gikulata sa mga kaubanan nga nahimong hinungdan sa kamatayon kay maoy naandan nga buhat diha sa PMA.
Dili ba diay mahimong suod ang inyong relasyon kon walay kulatahay nga mahitabo?
Ang hazing magahimo sa umaabot nga mga opisyal sa kasundalohan nga bangis, inay mahimong aghop alang sa paghiusa sa katawhan.
Daghan ang nagpangutana, hangtud kanus-a magpabilin ang hazing diha sa PMA ug uban pang hut-ong sa organisasyon sa AFP ug kapulisan?