TACURONG CITY -- Nagtingkagol na sa prisohan ang upat ka miyembro sa Bangsamoro Islamic Freedom Fighters nga giingong inspired group sa Islamic State of Iraq and Syria (ISIS) human masakote sa militar alas 4:50 sa hapon niadtong Martes, Septyembre 24.
Mga dinakpan mao sila Hassan Akgun, usa ka Swedish national; Abedin Camsa; Normia Camsa; ug Norshiya Camsa.
Sa taho gikan sa 601st Brigade, Philippine Army, nasayran nga nadakpan ang mga nahisgutan sa Joint Task Force Central sa Sitio Nakan, Barangay Kapaya, Bagumbayan, Sultan Kudarat.
Nakuha sulod sa balay nga gipuy-an sa mga terorista ang usa ka M16 Armalite rifle; usa ka kalibre .45 nga pistola; usa ka .38 revolver; usa ka 12 gauge shotgun; usa ka improvised explosive device (IED); 13 ka cellphones; 2 galon sa powder substance; 2 machine timers; 4 ka 9-bolts battery; 1 yellow bulb; 1 switch; usa ka bag nga dunay sulod nga ISIS flag; 3 led bulbs, 2 ka USBs, 1 resistor, 5 assorted wires, mga bala ug magazines.
Mga dinakpan gilambigit sa sunod-sunod nga pagpamomba sa Isulan nga nikalas ug niangol sa ubay-ubay nga kinabuhi.
Gitumbok sab nga mga suspek sakop ni Shiek Esmail Abdulmalik alyas Kumander Abu Toraife.
Samtang gidayeg ni Western Mindanao Command Chief, Lieutenant General Cirilito Sobejana ang Joint Task Force Central ug mga tawong mihatag og impormasyon sa gilubluban sa mga terorista.
Mga dinakpan pasakaan og tukmang kaso sa mga awtoridad. (Edgar E. Fuerzas)