PADAYON pang gisusi sa kapulisan ang motibo sa kamatayon sa usa ka lalaki nga gipusil sa Purok 9, Barangay Gabi, Compostela, Compostela Valley Province alas 3:50 sa kaadlawon, niadtong Lunes, Septyembre 23.
Ang biktima giila nga si Richard Manabacan, 26, may kapuyo, laborer ug molupyo sa nahisgutang dapit.
Sa report nga nakuha gikan sa ComVal Police Provincial Office, nasayran nga ang Compostela Municipal Police Station nakadawat og taho pinaagi sa selpon gikan sa nagpakabanang lungsuranon nga nagpahibalo sa maong insidente.
Daling niresponde ang kapulisan sa dapit aron subayon ang hitabo.
Base sa inisyal nga imbestigasyon, nasayran nga si Manabacan natulog tupad sa iyang kapuyo nga nailang si Lovely Jane Laparan, 26, sulod sa lawak sa ilang balay.
Apan kalit lang dunay usa ka wala mailhing lalaki ang pugsanong nisulod sa balay pinaagi sa pagguba sa atubangang bahin sa pultahan, dayong diretso sa biktima ug giguyod sa gawas sa lawak ug makadaghang higayong gipusil gamit ang wa matinong kalibre sa armas.
Human sa gihimong pagpamusil, ang suspek mikagiw palayo paingon sa wala masayring direksiyon sakay sa single nga motorsiklo.
Ang biktima nakahiagom og daghang mga samad pinusilan sa nagkadaiyang bahin sa lawas nga misangko sa hinanaling kamatayon.
Patay’ng lawas sa biktima gihaya sa Funeraria De Alar sa Purok 2, Barangay Poblacion sa lungsod.