USA ka gidudahang drug pusher nga giila sa bansag nga "Marijuana King" ug sinaligan sa napatay nga drug lord nga si Jeffrey "Jaguar" Diaz ang nasikop sa kapulisan sa Waterfront Police Station sa Sitio Villagonzalo 2, Barangay Tejero, dakbayan sa Sugbo niadtong Miyerkules sa gabii, Septyembre 25, 2019.
Nasikop sa kapulisan si Eric Rafols Deguitos, 57 anyos, atol sa gipahigayon nga hiniusang pagpangronda sa Waterfront Police Station ug ang Philippine Drug Enforcement Agency (PDEA) Central Visayas.
Nasakmit gikan ni Deguitos ang kapin usa ka kilo nga mga dahon sa marijuana ug mga pinutos sa papel ug plastic nga gitoohan nga andam na untang ihatud sa mga customer niini. Gawas sa mga pinutos nga marijuana, nasakmitan sad si Deguitos ug 10 gramos nga gidudahang shabu.
Sa pikas bahin moabot sa 1.1 milyones pesos ang kantidad nga na sakmit sa mga sakop sa mambaling police nga shabu gikan sa usa ka kanhi waiter nga si Jonathan Sumbal, 41 anyos,ug molopyo sa Sitio Kawayanan sa Barangay Mambaling ning siyudad. (Superbalita Cebu)