ORMOC CITY, Leyte -- Gipahimangnuan ang mga kawani sa lokal nga kagamhanan sa dakbayan sa Ormoc nga magtarung sa ilang trabaho, ilabi ang pagtungha sa City Hall nga sakto ra sa oras.
Si Bise Mayor Leo Carmelo Locsin Jr. sa dakbayan sa Ormoc, nipahimangno niini sa dihang nakigtabo siya sa kawani sa session hall kaganihang buntag.
Gibutyag sa bise mayor nga siya ug si Mayor Richard Gomez nakadawat og reklamo kabahin sa pipila ka kawani nga igo lang mopanso ug mopauli dayun sa ilang balay.
Giklaro ni Locsin nga gibawal ang maong binuhatan kay kung ang kawani maka time in na, di na pwede mo uli sa ilang balay.
Usa sa gisulti sa bise mayor nga duna usab mga kawani nga magsige lang og ka late.
Gani duna nay listahan nga gihuptan ang bise mayor niadtong mga kawani nga mag-sige og ka late.
Duna usab sumbong nga dunay uban nga kawani ang di makapanso bisan og naa sud sa city hall ug magsalig lang kini sa closed circuit television camera (CCTV).
Matod sa bise mayor nga kinahanglan nga mo gahin gyod og oras sa pag panso bisan naa sud sa city hall ug dili saligan ang CCTv kay mao kini ang makalangay sa pag process sa mga payroll nga makaamong sa uban nga kawani nga di dayun ma sweldohan.
Gipahimangnoan usab sa bise mayor ang mga drivers sa City Hall nga kung wala nay travel, ipabilin na ang yawe sa mga sakyanan sa opisina human sa oras sa trabaho.
Si City Councilor Lalaine Marcos nga nitambong sa maong meeting nibutyag nga duna usab siyay nadawat nga report bahin sa sexual harassment.
Si Locsin mibahad nga usa ka bug-at nga kalapasan sa trabaho ang sexual harassment.
Dugang sa bise mayor nga di sila motugot nga dunay ingon ini nga mga kawani sa administrasyon ug gisiguro nga ila kining tutukan ug himoan og aksyon.
Hinuon, hatagan og higayon ang maong kawani nga makapasabot sa iyang habig. (Superbalita Cebu)