Kyaw-Kyaw: Pamelikulang Pilipino aktibo na sab?

SIKAT pa gyud gihapon ang Sharon Cuneta-Gabby Concepcion tandem sumala sa nakita nga reaction sa mga nitambong sa Gabay Guro 2019 nga gihimo sa Mall of Asia Arena sa niaging Dominggo.

Matud ni Sharon nga ‘dumadagundong ang hiyawan at palakpak’ sa mga nanan-aw dihang nag-uban sa tablado ang duha ug nagduweto pa gyud.

Wala kuno unta sa programa ang duweto. Gisingit na lang kini human seryosong nagkaistorya ang duha sa backstage ug nagkauli ang maayong kabubut-on.

Ubay-ubay usab nga pelikula sa duha ang akong natan-aw sa una. Daghan pa sab tingaling mga Bisaya nga parehas ang gibati sa mga nakasaksi sa MOA Arena.

Usa ko sa nagpaabot sa tubag sa pangutana kon madayon na ba ang ilang reunion movie.

•••

Nalingaw ko sa kalambuan nga may bag-ong pelikula ang Regal Films diin ang mga bida mao sila si Jane Oineza, Tony Labrusca, Jerome Ponce, Albie Casiño ug Myrtle Sarrosa.

Ning bag-o lang, nagpagawas usab og bag-ong pelikula ang Viva Films. Bag-o pa lang usab nga nahuman ang pagsalida sa blockbuster sa Star Cinema nga Hello, Love, Goodbye.

Ang The Panti Sisters nga apil sa Pista ng Pelikulang Pilipino gikahimut-an sa mga makisine. Hinaut nga kining kasibot sa mga production companies ug ang suporta sa publiko nagtimaan nga aktibo na usab ang industriya sa pamelikulang Pilipino.

•••

Nakaduaw ko sa Kapitolyo adtong Lunes kay gipamalihog sa Bowssco Multi-purpose Cooperative sa Oslob pagpakisayod sa Provincial Engineer’s Office mahitungod sa pagpangitag lugar nga kabutangan og bomba sa tubig.

Nalingaw ko nga nakig-selfie sa akong mga higala ug kauban sa trabaho kanhi sama nila ni Prov’l. Engr. Hector Jamora, Asst. Prov’l. Engr. Eulogio Pelayre, Engr. Rey Mariñas, Tourism Officer Marti Ybañez (ug mga sakop nga si Chai Ompoc ug Lino Belarmino), Atty. Jong Sepulveda ug Prov’l. Health Officer Cristina Mariza Giango.

Wala ko magdahom nga makapa-selfie ko uban ni Gob. Gwen Garcia nga wa gyud mobalibad ug tam-is pa kaayog pahiyom nga niatubang sa camera. Nalingaw ko sa nindot nga reaction sa akong mga Facebook friends lakip na ang akong mga kauban kanhi sa Prov’l. Information Office nga niretiro na sab.

Ganahan sab diay sila makapapiktyur uban ni Gob. Gwen pero nagpanuko lang. Sige. Pahibal-on ta mo kon makabalik ko. Maayo kon makatayming ta nga naa si Gob.Gwen, way miting ug wa kaayoy bisita.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph