SA MGA nangita og beach area nga komportable nga adunay privacy, perfect beach getaway ang Alobijod Cove nga nahimutang sa Barangay Alobijod, Nueva Valencia, lalawigan sa Guimaras.
Halapad nga lapyagan nga gibulit sa puti nga balas nga gihapyod-hapyod sa mga balod diin ang mga isla maoy mosugat sa imong mga mata sa imong pagduaw sa maong Probinsya.
Sa maong beach resort nimo matagamtaman ang preskong hangin gikan sa paghampak sa mga balod ug sa unahan imong malantaw ang isla usab sa Ilo-Ilo City ug silingang mga local government unit.
Unsaon pag-adto?
Kon ikaw gikan sa dakbayan sa Sugbo, mahimo kang mosakay og barko gikan sa Pier 1 paingon sa dakbayan sa Ilo-ilo diin molanat og 12 oras ang biyahe, apan kon aduna kay igo nga pundo aron nga mas dali adunay biyahe sa eroplano.
Didto sa Ilo-ilo port, adunay lansa nga mobiyahe matag oras ug paglabay sa 30 minutos human pagbiya sa barko, maabot kana sa Port of Jordan nga maoy dunggo-anan sa tanang barko nga mobiyahe sa Guimaras.
Mahimong mosakay ka og tricycle o V-Hire paingon sa Alobijod Cove nga adunay distansiya nga 25 kilometros gikan sa pantalan.
Pag-abot nimo sa Alobijod Cove, mosugat kanimo ang mga maabi-abihon nga staff sa resort.
Rates ug fees
Kon gusto ka lang maligo sa makatintal nga kaanyag sa lapyahan, P50 ra ang entrance fee sa adult ug P30 sa mga bata.
Apan kon mokuha ka og room adunay tag-P1,800 para sa couple, P2,800 haom sa upat ka tawo ug P3,800 para sa 6 ka tawo diin 2 pm ang check-in time.
Dili ka magmahay kay ang rooms giplastada palibot sa property nga adunay kaugalingong balkonahi nga nag-atubang sa baybayon.
Perfect sab ang Alobijod Cove sa team building sanglit aduna silay 25 ka cottages nga nagkantidad og P600-P800 nga magdepende sa area ug gidak-on niini.
Apan ang nakanindot kay motanyag sab sila og island hopping nga sa tag - P600 ang matag oras gamit ang jetski ug banana boat sa silingan nga mga isla.
Kon dining experience ang maong resort nag-offer og Filipino ug Western cuisines.
Event
Si Melvin Marahay, kinsa maoy nag-develop sa Alobijod Cove nagkanayon nga sa ni-aging tuig pa sila niabli ug ang labing dako nga kalihukan nga ilang gipahigayon sa resort mao ang White Party diin lakip sa kalihukan mao ang lumba sa jetski ug gilibot ang kapin 100 kilometros nga gilapdon sa Guimaras island.
Plano ni Marahay nga ilang sublion ang maong event sa summer sunod tuig ug himuon nga yearly activity gumikan sa kalampusan sa unang tuig niini.
Sa pagkakaron, padayon pa ang pagpanindot ni Marahay sa labing sikat nga resort sa Guimaras.
Busa suwayi ninyo ang Alobijod Cove aron kamo mismo makapadayag sa uban pang kanindot sa area base sa inyong personal experience.