MGA duwa karon:
4:30 pm. NLEX vs. Meralco
7:00 pm. Magnolia vs. Northport
Magbuwag ang dalan sa sister-teams NLEX Road Warriors ug Meralco Bolts sa dihang mag-unay ang duha karong hapon sa Philippine Basketball Association (PBA) Governor’s Cup sa Smart Araneta Coliseum.
Ang duha mosulod sa korte sa alas 4:30 ang takna sa hapon nga pulos dala ang 1-1 nga baraha. Niadtong Sabado, ang Bolts mirehistro sa ilang unang daog human nila pakurentihi ang Magnolia Hotshots, 98-92.
Sa susamang adlaw, gilupig usab sa Road Warriors sa dinaganay ang Phoenix Pulse Fuel Masters, 116-123.
Sa main game sa alas 7:00 sa gabii, ang pagpakigsawo sa temporaryong liderato maoy tumong ug tuyo karon sa NorthPort Batang Pier ni coach Pido Jarencio sa ilang pagpakigsangka sa Magnolia.
Ang Northport mibuntog sa Rain or Shine Elasto Painters, 99-94, niadtong Septiyembre 20 didto sa Mall of Asia Arena ug ang ilang kadaugan karong gabii alang sa ilang 2-0 nga baraha diin ilang ikauban ang modaog tali NLEX ug Meralco sa ibabaw nga bahin sa standing.
Samtang sa laing bahin, gitugotan na sa PBA si Calvin Abueva nga makapraktis sa iyang mother team Phoenix Pulse.
Kini maoy gibutyag ni Phoenix head coach Louie Alas.
Matod pa nga nakakompleto na si Abueva sa iyang community service hinungdan nga gitugotan na kining maka-ensayo uban sa iyang team.
Hinuon dili pa gihapon siya makaduwa sa regular games sa PBA hangtod nga ilibkas na ang iyang pagkasuspenso.
Gikalipay ni Alas ang maong kalambuan sanglit gipaabot nga dako og matabang si Abueva sa Phoenix kinsa nakaangkon na og duha ka sunodsunod nga daog.
“This is super good news. Kasi ngayon at least may natatanaw ka nang liwanag doon sa dulo ng tunnel,” matod ni Alas.
Si Abueva napahamtangan og indefinite suspension tungod sa duha ka insidente. (JBM)