PITO ka kinabuhi ang nakalas sa dihang nalunod ang Dragon Boat Team sa Boracay samtang nag-ensayo kini sa kadagatan sa Boracay Island niadtong Miyerkules sa buntag.
Ang taho sa Philippine Coast Guard nagbutyag nga adunay 21 ka mga sakop sa team ang luwan sa Boracay Dragon Boat Team. Ang 14 niini ka mga survivors ang gidala sa Saint Gabriel Hospital.
Ang spokesman sa PCG nga si Captain Armand Balilo nagkanayon nga usa ka dakong bawod ang mihapak sa Dragon Boat nga maoy hinungdan sa pagkalunod niini. Kini nahitabo sa kadagatan sa Sitio Lingganay sa Barangay Manoc-Manoc mga alas 7:40 sa buntag.
Wala pay mga pangalan nga gibutyag ang PCG hangtod ning pagsulat apan sa pito ka mga nangamatay, tulo niini babaye ug upat ka lalaki.
Gibutyag sa PCG nga wa sila makadawat og pasiunang notisya kalabot sa gipahigayong training sa dragon boat.
“Wala pong information na dumating sa amin na magka-conduct sila ng training at that time po,” matod sa PCG-Aklan station commander Lt. Cdr. Marlowe Acevedo. “If we are informed na mag-conduct sila ng training, definitely po we will require them na magsuot po ng life jacket for their own safety,” dugang niya. “Noong time na nangyari po ito, medyo maalon so may tendency po na mapapailalim ang ating casualties. At that time, baka natamaan po sila.”
Giingon nga ang training sa maong team alang unta sa ilang pagsalmot og kompetisyon sa Kaohsiung City Cup sa Southern Taiwanese City karong Nobiyembre, pagbutyag sa laing team member nga si Remedy Aquino kinsa wala sa maong hitabo. (JBM, AFP)