SALIKWA-UT kining sitwasyon karon ni Bise Gob. Hilario Davide III isip presiding officer sa Cebu provincial board kay ang mga proyekto ug gipanghimo niya sa gobernador pa siya gipornada sa mga bokal nga iyang gipangulohan.
Ang una niini mao ang paghunong sa katukoran sa iyang pet project nga mao ang Cebu Provincial Resource Center. King maong 20 ka andana nga building mao unta ang himuong opisina sa mga buhatan sa Kapitolyo ug sa national government agencies. Gipahunong usab sa Kapitolyo ang pagpa-abang sa Davide administration sa lote ngadto sa Innoland Development Corporation (IDC) sukad sa Abril 2014 nga walay pagtugot sa provincial board. Gi-uli sa IDC ang 849 metros kwadrados nga luna apil na ang ilang gitukod nga showroom nga balor og P25 million.
Karong bag-o, atol sesyon ang mga bokal mipasar og resolusyon nga nagtugot kang Gob. Garcia sa pagsud og Memorandum of Agreement (MOA) uban sa Cebu Property Ventures and Development Corporation (CPVDC), nga karon Cebu Holdings Inc., sa pagbalik sa duha ka mga karsada nga mosud sa IT Park gikan sa Salinas Drive ug tulo ka laing mga dalan gikan sa Gov. M. Cuenco Ave. ngadto sa probinsinya sa Sugbo. Sa laing kontrata ang Kapitolyo mi-pirma og Build-Transfer-Operate agreement uban sa Filinvest sa pagtukod og upat ka mga BPO building sa 1.2 ektaryang luna sa Cebu IT Park nga iya sa probinsiya. Suma ni Garcia nga “disadvantageous” sa lalawigan ang unang kontrata nga gisudlan sa Davide administration.
Unsa kahay gibati sa bise gobernador nga siya maoy masulikat sa mga resolusyon sa mga bokal sa sesyon nga siya maoy presiding officer. Wa kaha siya magbasul nga midagan siya sa pagka-bise nalang inay magpapili pag-usab sa pagka-gobernador? Dili man gud kini maoy katapusang higayon nga siya maunay sa iyang kaugalingong tari. Murag naa pay daghang umaabut.
SEC Circular
Gi-aksiyunan sa Securities and Exchange Commission (SEC) ang daghang reklamo sa katawhan batok niining mga financing company (FC) ug lending company (LC) nga manghasi ngadto sa mga maka-utang kanila gamit ang abusado,way batasan ug di maki-angayong mga pulong aron pagpaningil. Kining mga FC ug LC mogamit og mga third party aron maoy ilang sugu-on pagpaningil aron dili sila maoy mabuthan sa ilang mga kliyente. Suma sa ilang Memorandum Circular No. 18 series of 2019 ang mga LC nga makalapas sa maong circular multahan og P25,000 sa first offense ug P50,000 sa second offense. Ang FC multahan og P50,000 sa first offense ug P100,000 sa second offense. Sa third offense ang LC ug FC, sigun sa discretion sa SEC, multahan og doble kaysa second offense apan dili mulapas sa P1 million. Mahimo usab silang suspensohun o kaha tangtangan gayud sa Certificate of Authority to Operate sa ilang negosyo. Pinaagi niini hinaut pang mahunong na kining abusadong paagi sa paghasi sa mga FC ug LC sa ilang mga kliyenteng utangan.
(msr1144@gmail.com)