DIDTO sa Estados Unidos ang mga imbestigador motratar sa mga kasong suicide nga murder. Dili dayon sila mo-conclude nga usa ka suicide case bisan aduna silay ma-recover nga suicide note gikan sa biktima. Unya ra sila mo-conclude kon ila nang masuta ang tanang anggulo o makakuha na og igo og lig-ong ebidensiya pinaagi sa mga physical og technical findings sama sa autopsy ug uban pa. Apan dinhi sa ato, ang atong mga imbestigador, gumikan ba kaha kay tapulan, mo-conclude dayon nga suicide case bisan kulang sa ebedensiya.
Kining nahitabo ni Cary Llaguno, igsoon niadtong napatay nga druglord nga si Crisostomo Llaguno alyas Tata Negro, dili dayon unta lamyon sa atong mga imbestigador. Ngano man? Gumikan kay basin og taktika lang kini aron maka-change identity siya gumikan kay init na ang iyang ngalan sa kapulisan ug usa siya ka high value target sa drugas.
Matod pa sa taho, si Llaguno gisulong og mga armadong mga tawo sa iyang gi-estahan nga balay sa bukirang barangay Babag 1 ning dakbayan. Mokabat ngadto sa 30 ka mga armadong tawo ang misulong sa iyang panimalay. Gipagawas ang iyang live in partner ug ubang tawo. Unya gipusil si Llaguno ug dayon gisunog ang iyang panimalay. Naapil siya sa pagkapaig.
Ang unang himoon sa atong mga imbestigador mao ang pagsuta kon tawo ba gyud ang nasunog. Dili kaha to hayop? Ug si Llaguno ba gyud ang maong tawo nga gisunog? Nganong gisunog pa man siya human patya? Mao kini ang mga tanghaga ug gumunhap nga angay sutaon og maayo sa atong mga imbestigador. Dili lang dayon unta sila molamoy sa version sa mga kauban ni Llaguno kay basin baya nagdrama lang sila nga gipagawas nga patay na siya aron di na magukod.
Nganong misugyot ko niini? Aron masuta ang tinud-anay nga identity ni Llaguno aron mawala ang pagduda sa katawhan. Daghan ang nagduda nga dili si Jeffrey “Jaguar” Diaz ang napatay didto sa kauluhan ug gilubong dinhi. Daghan ang nagduda nga dili si Franz Sabalones ang gipatay sa Quezon City kay hangtod karon wala pa kuhaa ang patay’ng lawas sa iyang mga kabanay. Basin motumaw na usab ang pagduda kon si Llaguno ba kining gipatay ug gisunog. (bobbygnalzaro@gmail.com)