GRABE ang pagpatay kang Cary Llaguno, giingong negusyante og tubig ug igsuon ni anhing Crisostomo “Tata Negro” Llaguno. Gigapos, gipatay dayon gisunog ang iyang balay samtang naa siya sa sulod. Uling na ang iyang lawas dihang nakaplagan taliwa sa naugdaw nga balay.
Di ordinaryo ang operasyon kay gilangkuban kini sa gibana-banang 30 ka mga tawo. Bisan ang dakong drug organization maglisod sa pagpalihok og ingon niadto nga matang sa operasyon. Busa, ang dudahan dayon sa publiko mao ang mga awtoridad, labina kay ang biktima igsuon sa usa sa mga gitumbok nga kanhi drug lord sa Sugbo.
Ang amahan sa kapuyo ni Llaguno nihulagway sa mga armadong tawo nga nagdala og tag-as nga mga armas, dunay uniporme ang uban ug naka bullet proof vest.
Ang mao nga description susama sa mga tawo nga ni-operate usab sa pagpatay kang kanhi mayor Ricardo Ramirez sa Medellin. High-powered ang mga armas, nagtaptap sa mga nawong, nag-uniporme ug nagka bullet proof vests.
Sama usab sa kang Ramirez, ang dagan sa estorya sa mga pulis ning kamatayon ni Llaguno padulong ra gihapon sa open ending nga imbestigasyon, way padulngan. Madugang ra ni sa statistics sa mga tawo nga nangamatay tungod sa pagkalambigit sa illegal drugs.
Maingon ani ra sab ni sa nagkadaghang drugs, apan way mapakitang imbentaryo ang kapulisan hain na ni ang ilang nasakmit. Kay bisan sa kadaghan na sa mga nadakpan ug napatay, ang drugas way hubashubas. Mao nang sa social media, mga netizen nagtuo nga recycled ra ni.
Kining mga patay sa mga tawo nga gilambigit sa illegal drugs ug ang minilyon nga nasakmit nga illegal drugs puro ra hanap ang mga tubag sa kapulisan. Ang linya naandan ug nagbalikbalik, sama sa plakang buak, ingon sa ang ulo ra sa publiko ang gipatuyoktuyok.