GIBASOL ni Gobernador Gwendolyn Garcia ang buhatan sa Department of Education (DepEd) Cebu Province tungod sa nahitabong kalangay sa pagpatukod sa mga lawak-saringan ug school buildings nga nag ung-ong sukad pa niadtong 2018.
Atol sa nahitabong pulong sa Provincial School Board nasayran nga sa kinatibuk-an nga 739 duna pay moabot sa 677 ka mga lawak saringan ang wala pa matukod.
Ang 62 niini ang nakompleto na sa miaging tuig, samtang 82 ang wa pa makompleto karong tuiga.
Matod ni Garcia nga walay saktong koordinasyon ang DepEd ngadto sa Department of Public Works and Highways (DPWH) sa mga proyekto niini hinungdan nga hangtod karon may mga tunghaan gihapon nga nagbalay-balay aron makapahigayon sa klase.
“I expect from now on, sorry lang kay ako nay gobernador, you should have a closer coordination with our local government units and an honest-to-goodness validation of school site. Congress has provided an enormous budget for this school building program for DepEd,” matod ni Garcia.
Pagtin-aw ni April Custodio, engineer sa DepEd province, nga duna sila’y problema sa ka langayan sa kontraktor, kakuwang sa mga tawo nga nagpanday sa mga classrooms, ug ang kalisod sa pagkuha ug building permits maoy hinungdan nga nalangay ang mga proyekto.
Apan si Garcia miinsister nga sa kaniadto pa, kanunay lang malangay ang pagtukod sa classrooms tungod kay maghuwat pa ang DPWH sa resulta sa soil testing sa DepEd.
Dugang niya nga giusikan lang sa DepEd ang minilyon nga budget alang sa pagpahimo ug mga lawak nga apan gilangay-langay nila kini.
Hinuon, gi-blocklist na sa DPWH ang kaniadtong kontraktor nga gibasol sa DepEd nga naglangaylangay sa proyekto.
Hinungdan nga gimandoan karon sa gobernador ang DepEd sa pagsiguro nga ma-validate ang records sa kon asa nga mga lugar ang nagkinahanglan pa og classrooms, ingon man ang pagsiguro nga igo ang luna nga katukuran ini.
“Di na ninyo aku-akohon, kinahanglan naay klaro nga coordination, DPWH is the most competent to ascertain whether or not there is sufficient area for the construction of a two-storey or three-storey school building,” matod ni Garcia.
Misaad atubangan sa School Board ang DepEd sa pag-secure niining tanan, mipasalig usab ang DPWH nga mahuman na ang mga proyekto karong Disyembre. (ANV)