ALL set na ang kantang ibirit sa Mindanaon nga usa sa finalist sa Tawag ng Tanghalan sa It's Showtime nga si John Michael dela Cerna.
Sa pakigtsikahan sa Superbalita Davao kang Anthony de Lara, kauban ni JM (angga) karon sa kauluhan, gisulti niining "fight song" sa singer ang giandam niya sa finals.
"Nag-brain storming kami with JM, usa ka song, then medley siya," ni Anthony, diin kauban sab niya sa pagpili og kanta ug pagkonsepto si Frank Fabroa.
Si JM ug Anthony, magka-uban sa Koro Dabawenyo, usa ka inila ug multi-awarded nga myembro sa choir group dinhi sa Davao, samtang si Frank usa ka higala nilang anaa sab sa linya ang pagkanta.
Dugang ni Anthony nga ang kanta ni JM naghulagway sa iyang mga dreams sa kinabuhi. "Bawal man gud isulti, pero about his dreams ang iyang kanta."
Suma pa, daw blessings in disguise sab ang pagpili ni JM sa kantang "Imagine" ni John Lennon.
Wa damha nga ang maong kanta nga gihatagan og bag-ong rendesiyon ni JM mao diay ang mohatag kaniya og dalan padung finals.
Ni Anthony, nagsakit pa si JM tungod sa pipila ka adlaw nga bakbakan nila sa kompetisyon.
Ug aron mapreserba ang tingog, ni Anthony si JM gidid-an nilang moinum og bugnaw nga tubig, matug og sakto.
"Magtimpla sab mi og calamansi ug honey ug luy-a para niya."
Suporta
Nanawagan sab og suporta ang tropa ni JM ilabi na nga dakong pahat sa puntos gikan sa botasyon.
Sa pagboto, ania ang proseso.
Pinaagi sa text message:
Text TAWAG JOHNMICHAEL ug i-send sa 2366 alang sa tanang networks.
P1.00 kada boto (1 vote per sim, per day)
Sa online:
Pag-log in sa VOTE.ABS-CBN.COm/TAWAGNGTANGHALAN ug i-klik ang vote ilawom sa JOHN MICHAEL (one vote per Kapamilya Account per day)
Beterano
Sa pakighinabi kaniadto kang JM sa Superbalita Davao, giyagyag niini nga di na siya bag-o sa mga pakontest.
"Naga-apil ko sa amateur, barangay, pero kani first time nako sa TV," suma sa taga-Sasa ning siyudad sa Davao.
"Singing is really my passion. Gikan sa akoang parents, lolo ug lola, love gyud namo ang pagkanta," dugang niya.