Ex-Army naharang sa pulis; mga armas, granada sakmit

KANHI sundalo ug kauban ang giposasan sa mga awtoridad human nga nadiparahan nga nagdala og mga armas ug eksplosibo sa checkpoint sa Provincial Road sa Purok 3, Barangay Madaum, Tagum City sayo sa buntag kagahapon, Septyembre 26.

Kini mismo ang gikompirma ni Police Brigadier General Marcelo Morales, director sa Police Regional Office-Davao.

Base sa imbestigasyon, nasayran nga ala 1:00 sa kaadlawon kagahapon, Septyembre 26, mga elemento sa Tagum City Police Station ug Regional Mobile Force Battalion-Davao naglusad og checkpoint operation sa maong dapit isip area security atol sa hiniusang buy-bust operation sa maong dapit ug gihunong ang duruha nga sakay sa motorsiklo ug gipangsikop.

Mga suspek giila nga si Tersie Jones Galit Besire, 41, kanhi sakop sa Armed Forces of the Philippines, minyo ug molupyo sa Pilar Village, Barangay Apokon, Tagum City, kinsa maoy nagmaneho sa motorsiklo.

Nakuha gikan kaniya ang usa ka Colt MK IV caliber .45 pistol nga dunay serial number FA08659 ug magazine nga dunay lima ka mga buhing mga bala.

Apil nga gisikop mao ang iyang angkas nga si Jubail Maraug Cabaguio, 21, minyo ug ug molupyo sa Purok 1A, Barangay Madaum, Tagum City tungod sa pagdala og usa ka Colt Government Model caliber .45 pistol nga papas na ang serial number, magazine nga dunay pito ka mga buhing bala.

Nasayran nga gawas sa mga armas, narekober sab sa mga awtoridad gikan sa utility box sa gisakyan nilang itom nga Honda XRM 125 nga dunay temporaryong plate number 111004124155 og usa ka MK2 fragmentation grenade.

Sa dihang gipangayoan og pertinenteng papeles sa mga armas, way gipakita ang duruha, hinungdan nga gidakop.

Si Morales daling nagmando kang Davao del Norte Police Provincial Office Director Ranie Hachuela nga molusad og lawom nga imbestigasyon sa pagkatawo sa mga nadakpang mga suspek.

"Gusto kong malaman ano ang mga motibo nitong dalawa sa pagdadala ng mga baril at granada, lalo pa at walang itong mga permit to carry. Nevertheless, our fight against criminality continues. In fact, more intensified. With the recent bombings in our nearby provinces, we do not want to be complacent with our security measures. We have to be 24/7 alert, and we will conscientiously perform our job," matud ni Morales.

Kasong kalapasan sa Republic Act (RA) 10591 (Illegal Possession of Firearms and Explosives) ug RA 9516 giandam na batok sa mga dinakpan kinsa kasamtangang gipriso sa Tagum City Police Station.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph