COTABATO CITY -- Usa ka masuso nga nagpangedaron pa lang og tulo ka bulan ang gituohan nga dunay "poliomyelitis" sa siyudad.
Ang bata anaa karon sa isolation room sa Cotabato Regional and Medical Center (CRMC).
Mga tinubdan gikan sa Department of Health (DOH)-Soccsksargen nagsulti nga ang bata gidawat sa CRMC tungod sa hilanat ug paralysis sa usa ka bitiis.
Matud ni Jenny Panizalez, information officer sa DOH-Soccsksargen, nga gisugdan na sa CRMC ang pagsusi sa masuso kung positibo pa siya sa poliomyelitis.
Si Panizalez miingon nga ang mga specimen nga nakuha sa mga doktor gikan sa bata gisumite na alang sa laboratoryo.
Ang poliomyelitis o infantile paralysis nga giila nga polio usa ka infectious disease nga makatakod hinungdan sa polio virus.
Giklaro sab ni Panizalez nga luwas sa polio virus ang Soccsksargen gumikan ang bata nga anaa sa CRMC dili pa positibo sa poliomyelitis gumikan gipailawom pa siya pagsusi sa mga doktor.