NAA sa listahan ni Presidente Rodrigo Duterte si Cary Llaguno, kinsa gipatay ug gisunog niadtong Miyerkules sa kaadlawon, Septiyembre 25, sa Barangay Babag 1, Dakbayan sa Sugbo.
Si Cary igsuon ni Crisostomo Llaguno, alyas Tata Negro, giingong drug lord sa Sugbo nga gipatay niadtong Mayo 2010.
Igsuon ni Tata Negro nga gisunog patay sa iyang balay sa barangay Babag 1 sa bukirang dapit sa siyudad sa Sugbo ang giingong nalakip sa listahan ni President Rodrigo Duterte.
Nakadawat og impormasyon si Police Regional Director Brigadier General Debold Sinas nga nalakip sa listahan ni Duterte si Llaguno.
Giingong kini na ang mihulip sa iyang igsuon nga si Tata Negro.
Matod ni Sinas nga dako kaayo ang ilang katingala nganong ingon niadto ka brutal ang pagpatay kang Llaguno, kinsa giapil pa sa pagsunog sa iyang balay.
Nagtuo ang heneral nga adunay kalambigitan sa ilegal nga drugas ang krimen.
Dako usab ang posibilidad nga ang mga suspek nga mihimo niini adunay gihambin nga dakong kasuko kang Llaguno kon basehan ang pamaagi sa pagpatay.
“Akong gipaimbestigahan kay kato siya kay sa among tan-aw he was with the list of PRRD (Duterte). Gipa background check nako nganong ingn ato man ka weird, gipatay na, gisunog pa. So, accordingly he was really deep into drugs,” matod ni Sinas.
Nagduda
Di makatuo si Sinas sa pamahayag sa amahan sa live in partner ni Llaguno nga si Sanny Loredo nga 30 ka armadong tawo ang misulod sa balay nga pulos naka bullet proof vest nga daw mga awtoridad.
Dako ang posibilidad nga gipasobrahan lang ang pamahayag ni Loredo tungod kay kon tinuod pa kini, aduna untay makakita nga mga tawo sa kasikbit nga dapit sa barangay Babag 1 sa presensya sa mga armadong lalake.
Bisan si Police Colonel Gemma Vinluan, hepe sa Cebu City Police Office, nagkanayon nga di siya makatuo nga 30 ka mga tawo nga armado ang ningsulong sa balay ni Llaguno.
Matod niya nga ipa validate niya ang pamahayag sa mga saksi tungod kay wa dayon kini makaabot ang report sa mga awtoridad.
DNA test
Gusto ni Sinas nga ipaubos sa DNA test ang napaig nga lawas ni Llaguno aron matino kon mao ba kini ang napalgan.
Gipasabot ni Sinas nga wala pa silay kasigurohan nga ang namatay mao ba si Llaguno sanglit nagbase lang ang mga imbestigador sa mga pamahayag sa mga saksi.
“Siguro kon kinahanglan nato ang identity, ako nalang i-request ang DNA para mahibaw-an nato kon siya gyud, kay pangalan ra man ang gihatag nga kini siya mao si Tangkag,” dugang ni Sinas.
Matod ni Sinas nga mahimong di si Tangkag, alyas ni Cary, ang namatay ug ang tinuod nga biktima buhi ra diay hinungdan nga importante kaayo ang DNA test.
Ang mga sakop sa Scene of the Crime Operation misusi sa napaig nga lawas sa tawo apan wa na silay nakuha nga ebidensya nga kini nagpamatuod nga lawas ni Llaguno.