MAGSAYSAY, Davao del Sur -- Usa ka dalaga gikan sa tribung B’laan ang miangkon sa titulong “Hiyas sa Kialeg 2019” atol sa indigay sa 12 ka mga dalaga nga sakop sa nagkadaiyang tribu, Huwebes sa gabii, Septyembre 26.
Ang 21-anyos nga si Rhea Mae Saban ang bag-ong “ambassadress of goodwill” sa munisipyo, maoy modala sa tingog sa mga batan-on human naangkon ang korona.
Gipangunahan ni Mayor Arthur Davin ug Judge Carmelita Sarno-Davin ang pag-korona sa bag-ong Hiyas.
Atol sa kompetisyon, gipadayag sa mga kandidata nga gikan sa nagkadaiyang tribu sa lugar ang ilang tradisyon ug kultura.
Si Saban atol sa question and answer portion, gipaklaro nga angayang dili ikaulaw sa mga sakop sa tribu ang ilang kultura ug tradisyon.
Gitataw sab niini nga angayang ma-edukar ang mga lumad sa kabukiran, mahatagan og saktong pagtagad ilabi pa sa community development program.
Dugang niya, nga angayang ma-protektahan ang ancestral domain ug mawagtang ang diskriminasyon ngadto sa mga Lumad pinaagi sa paghatag og respeto ilabi pa sa ninuno.
Nanghinaut sab ang mga lokal nga opisyal sa lungsod nga pinaagi sa bag-ong napiling Hiyas, mahimo niini ang iyang mga buluhaton isip kabahin sa paghimo og mga programa alang sa komunidad ilabi pa ang pagtabang sa kampanya sa illegal nga druga.
Ubang mananaug mao sila Leira Joy Domingo sa Poblacion isip Hiyas sa Turismo ug Joerelyn Antipuesto sa Tacul isip Hiyas sa Agrikultura.