HUSTISYA karon ang gisinggit sa kabanay sa gipatay nga si Jericho Nacar Funcion, 32-anyos, kinsa gitabangan og dunggab-patay sa gituohang mga miyembro sa gang sa Kasilak, Barangay 76-A, Bucana Davao City, Biyernes sa kaadlawon, Septyembre 27.
Sumala ni Rica Funcion, inahan sa biktima, nga di gayod niya madawat ang nahitabo sanglit buotan ang iyang anak diin malingaw lamang kini og duwa og mobile legends kung walay trabaho.
“Di gayud nako madawat ang nahitabo, kinahanglan masikop gyud tong mga bataa, mga menor ang uban,” ingon ni Rica kinsa nahinabi sa mga tigbalita, Biyernes sa San Pedro Police Station.
Subay sa blotter nga natala sa San Pedro PNP, ang gitudlong nag-unang suspek mao si Jihad Saman Galanto, 19-anyos, taga Dapsa, Saint John, Bucana.
Nasayran nga ala 1 sa kaadlawon sa maong adlaw, naglingkod ang biktima nga nalingaw og dula sa mobile legends sa iyang selpon, uban sa usa pa niini ka barkada.
Apan kalit silang giduol sa grupo sa mga batan-on, dayon gitabangan og kulata ang biktima ug gidunggab sa makadaghang higayon.
Nanagan gilayon ang giingong pito ka mga batan-on, apan nasikop si Galanto nga maoy gitudlong primary suspect ug ang laing duha ka menor de edad.
Dugang nasayran sa imbestigasyon nga gikan sa Duterte Street ang grupo ug dunay gigukod nga kalaban, apan ang biktima ang naabtan ug napahimungtan.
“Ang ilang kalaki ngari, kuridason nila, kutob sa makita ug maabtan, ilang hilabtan,” sulti sa usa ka residente sa Kasilak.
Tungod sa hitabo, nanawagan ang mga residente sa Barangay 76-A nga pakusgan pa unta sa barangay ang ilang peace and order council ug ipabilin sa makanunay ang pag-roving sa mga tanod aron wala nay mga batan-on nga mag-istambay sa dis-oras sa kagabhion.
Sa kasamtangan, ang suspek padayong giimbestigahan sa kapulisan sa San Pedro PNP samtang ang duha ka menor nga nasikop anaa sa pagkustodiya sa Davao City Social Services and Development Office-Quick Response Team for Children’s Concern.
Padayong naghimo og manhunt operation ang kapulisan sa San Pedro PNP batok sa mga suspek.