MGA duwa karon:
12:30- USC batok SWU (High School)
2:00 pm- UC batok USPF (High School)
3:30 pm- SWU batok CITU (College)
5:00 pm- USJ-R batok (USPF)-College
Gilaumang mamungot ang Southwestern University (SWU)-Phinma Cobras sa ilang pagpakigbatok sa Cebu Institute of Technology University (CITU) Wildcats sa ikatulong duwa karong hapon sa Cebu Schools Athletic Foundation Inc. (CESAFI) basketball college division sa Cebu Coliseum.
Ang Cobras, nga maoy kampiyon sa pre-season nga mao ang Partner’s Cup, gikan sa masakit nga kapildihan batok sa defending champions University of the Visayas (UV) Green Lancers, 66-71, niadto lang Huwebes.
Kining maong kapildihan maoy nakaputol sa tulo ka sunodsunod nga kadaugan sa Cobras nga nagtagak gikan sa liderato.
Ang Green Lancers, nga adunay 4-1 nga rekord, mao na'y nag-una sa kasamtangan.
Nagkanayon si Cobras coach Mike Reyes nga kinahanglan nilang ilubong dayon sa kalimot ang masakit nilang kapildihan nga nasinati batok sa Green Lancers, nga maoy ilang gibiktima sulod sa duha ka sunodsunod nga mga duwa sa miaging Partner’s Cup finals series.
Gipasabot ni Reyes nga kinahanglan nilang magtutok na sa umaabot ug bawnon ang leksyon nga ilang nakat-unan gikan sa ilang kapildihan batok sa Green Lancers.
“If we plan to be contenders, we have to forget about last night and play better,” matod ni Reyes sa interbyu sa Sun.Star Cebu.
Batok sa Wildcats, nga maoy bugtong team nga wala’y import ning tuiga, gilauman nga dili ra maglisod ang Cobras sa pagbangon dayon gikan sa pagkapandol.
Ang Wildcats kasamtangang nagkagidlay ug wala pa kini nakatilaw og daog sulod sa upat ka mga duwa.
Sa main game, magsangka ang University of San Jose-Recoletos (USJ-R) Jaguars batok University of Southern Philippines Foundation (USPF) Panthers sa laing kombati sa college division.
Ang Jaguars kasamtangang adunay 1-3 nga rekord samtang ang Panthers naggunit og 2-2 nga baraha.
Sa high school division, protektahan sa defending champions University of Cebu (UC) Baby Webmasters ang ilang limpiyong rekord batok sa USPF Baby Panthers sa ikaduhang duwa.
Ang Baby Webmasters kasamtangang nag-una sa standing dala ang 4-0 nga rekord samtang ang Baby Panthers adunay 3-1 nga rekord.
Magkombati sa premirong duwa mao ang SWU Baby Cobras ug USC Baby Warriors.
Ang Baby Webmasters adunay 4-0 nga rekord samtang ang Baby Warriors naggunit og 1-8 nga baraha. (ESL)