NANGHINAOT ko sa unos ug bagyo.
Basin pa ang unos mobanlas kanimo
Aron ikuyog ka inig pangatagak
Sa mga lusok sa ulan
O ganuyon ba hinuon sa katahom
Sa bangaw ang imong kaanyag
Balik sa akong mga bukton.
Atngan ko ang nagtulilik
Nga larag dahon sa hambalalod.
Apan kon wala ka mahisakay
Bisag mihalok na sa yuta
Ang katapusang laya
Himuan ko og tulay
Kanang dalan nga giputol
Sa bung-aw.
Basin pa dinha ko matultolan
Ang imong kalibutan.