GIKAN dinhi mosubay ta sa taas nga dalan
Diin atong ikasugat ang usa ka libo ug usa
Ka mga binuhat ni Bathala.
Tingali silang tanan wala makaila kanato
Ug kanila pipila lamang ang atong nailhan.
Sa atong pagbaklay ning hataas nga dalan
May mga mata nga nagtan-aw sa atong mga tunob
Diha sa sementadong dalan, diha sa kalapukan,
Bisan gani diha sa mga bunbon sa baybayon
Bisan pag panason kini sa di-maihap nga dapya
Sa mga balod.
Inig-abot nato sa tumoy ning taas nga dalan
Ang Tag-iya sa mga mata motimbang sa atong agi.
Bililhon ang maayo ug hapsay nga mga tunob
Kaysa tunob nga nahibilin sa kalapukan.
Sa tumoy ning taas nga dalan nga atong gisubay
May duha ka dalan sab nga nagsanga.
Ang naghuwat nga Sinugo sa Labing Gamhanan
Maoy momando kon asa kita niya paagia --
Sa tuo ba o sa wala!