LALAKE nga tig-arrange sa mga buwak sa flowershop sa iyang hinigugma sa Freedom Park sa Carbon Market sa Dakbayan sa Sugbo gipusil sa iyang silingan nga kanhi sundawo.
Ang hitabo niadtong Miyerkules sa gabii wa mataho ug niana nang Huwebes, Septiyembre 26, nahibaw-an sa kapulisan.
Si Larry Fantonial, 45, taga Barangay Babag, Dakbayan sa Sugbo, namatay sulod sa tambalanan niadtong Huwebes, usa ka adlaw human siya pusila sa suspek nga nailhan lang sa alyas nga Louie.
Si P/ Capt. Dexter Basirgo, hepe sa Mabolo Police Station, niingon nga base sa sulti sa hinigugma ni Fantonial nga si Jacquiline Briones, padung sa ilang tindahan ang biktima kay maoy mang-arrange sa mga buwak.
Nagsakay si Fantonial sa iyang motorsiklo, apan nag-atang si Louie sa may Sityo Lamacan, Barangay Babag ug gipusil ang biktima kinsa naigo sa tuong dughan.
Wa matino nila ni Basirgo ang motibo sa pagpusil samtang ang suspek wa pa madakpi sa pagsuwat ning taho.
Samtang angol ang usa ka drayber sa motorsiklo human pusila sa iyang silingan nga iyang gibadlong sa pagsige og pabuto sa iyang armas.
Matod pa ni PSsgt. Arnold Labini sa Danao Police Station nga nahitabo ang pagpamusil hapit na mag alas dose sa Huwebes sa gabii, Septiyembre 26.
Ang biktima giila nga si Arniel Rom, 47, minyo samtang ang suspek nga iyang rang silingan giila nga si Carlito Ramos.
Ang duha mga lumolupyo sa Barangay Tuburan Sur, Dakbayan sa Danao.
Sa imbestigasyon sa Danao City Police, nasuta nga nagsige og pabuto sa armas si Ramos sukad pa nianang adlawan.
Nianang lawom nang gabii, nagkita sila si Rom ug Ramos.
Giingong gibadlong ni Rom si Ramos nga di magsige og pabuto. Nasuko si Ramos, nilanit sa iyang armas ug gipusil si Rom sa dughan.
Daling gidala si Rom sa ospital sa Danao apan daling gipabalhin sa Dakbayan sa Sugbo.
Naa na sa luwas nga kahimtang si Rom samtang si Ramos nakaeskapo. Mga pulis nakakuhag usa ka bala sa .45 kalibreng pistola. (BBT)