GIBALHIN sa Commission on Elections (Comelec) sa Dakbayan sa Sugbo ang ilang rehistrasyon ngadto sa Robinsons Galleria sa North Reclamation Area sugod sa Biyernes, Septiyembre 27, hangtod sa Lunes, Septiyembre 30.
Si Atty. Marchel Sarno, election officer sa north district, nagkanayon nga kini isip pagpangandam sa pagdagsa sa daghang mga tawo sanglit kutob na lang sa Septiyembre 30 ang ilang pagpangrehistro.
“From the last three days, atong napanglantawan nga daghan gyud ang magparehistro. Sugod Friday, Saturday and Monday kay wa man tay Sunday,” padayag ni Sarno.
Ang election officer sa north district nibutyag nga nahimutang sa second floor ang north district samtang sa third floor sa Galleria ang south district ni Atty. Edwin Cadungog.
Si Sarno nagkanayon nga ilang nahukman nga ibalhin ang rehistrasyon sa nahabiling tulo ka adlaw sanglit di na paigo sa ilang opisina ang mga tawo nga modagsa. Para usab mahimong komportable ang gustong magparehistro.
Iyang gibana-bana nga maka-accomodate sila og 800 ngadto sa 1,000 ka mga tawo kinsa gustong magparehistro matag adlaw gamit ang upat ka data capturing machine.
Ang magparehistro magdala lang sa ilang mga identification card o birth certificate para sa pagpamatuod nga sila lapas na 18 anyos ug mahimo nang makabotar sa mosunod nga eleksyon.
Si Sarno nagkanayon nga padayon silang nangandam para sa barangay elections sunod tuig sanglit wa pa mapasar sa Kongreso ang balaudnon nga giduso ni Senator Bong Go nga mag-uswag sa eleksyon. (PAC)