ARON pagtuki sa pagguba sa mga nasakmit nga illegal drugs, pag-imbentaryo niini sa kapulisan ug Philippine Drug Enforcement Agency (PDEA), si Cebu City Konsehal Antonio Cuenco nagtinguha nga pakigtagbuan sila uban na ang mga huwes.
Matod ni Cuenco nga sa nangaging katuigan diin dul-an na sa P1 billion ang balor sa illegal drugs nga nasakmit, way imbentaryo ug pagguba sa mga ebidensya.
Buot ni Cuenco nga mawagtang ang mga pagduda sa katawhan nga gi-recycle ang nasakmit nga drugas.
Naalarma siya sa mga nanggawas nga balita sa kaulohan kalabot sa mga pulis nga nalambigit sa pag-recycle sa mga illegal nga drugas kun ninja cops.
Niadtong Martes, Septiyembre 24 atol sa ilang session, nipadangat sa iyang privilege speech si Cuenco aro pagpangayo og imbentaryo sa mga nasakmit nga drugas ug pagpangutana kon ngano wala pa gihapon kini masunog.
Dugang sa kanhi kongresista, kinsa maoy nangamahan sa Comprehensive Dangerous Drugs Act of 2002, nga kon nalangay sila sa pagsunog sa mga nasakmit nga shabu kay wala pay court order, mas maayo nga sila ang moawhag sa korte pinaagi sa pagduso og motion alang sa pagpangayo og court order.
Gisegundahan kini ni Atty. Clarence Paul Oaminal, ang kanhi vice chair sa Dangerous Drugs Board (DDB).
Himuon sa Oktubre ning tuiga ang tigum, matod ni Cuenco, atol sa gipatawag niya nga press conference Biyernes sa buntag, Septiyembre 27.
Dugang ni Cuenco nga hatagan niya og duha ka mga semana sugod niadtong Martes, ang kapulisan sa Siyudad sa Sugbo ug PDEA 7 sa iyang gipangayo nga inbentaryo sa tanang drugas nga nasakmit sugod pa lang sa 2014 hangtod karon.
Dugang pasabot ni Cuenco, gihimo nila kini aron pagwagtang sa pagduda sa publiko nga gi-recycle ang nasakmit nga drugas sa mga operasyon.
Uyon
Sa iyang bahin, si PDEA 7 Director Wardley Getalla nihangop sa plano sa konsehal ug nipadayag sa ilang kaandam.
Katapusan nga nihimo og destruction sa mga nasakmit nga drugas ang PDEA 7 niadtong 2017.
Aron usab kalikayan sa mga pulis sa siyudad sa Sugbo ang pag recycle sa nasakmit nga illegal nga drugas, ang hepe sa Cebu City Police Office mipagawas og kamandoan nga ang tanang pulis nga apil sa anti drug operations magsul-ob og karsones nga way bulsa ug kapkapan aron masiguro nga way gikawat nga pinakete sa illegal nga drugas.
Giangkon hinuon ni CCPO Director Police Colonel Gemma Vinluan nga mahimong maka recycle ang mga pulis panahon sa ilang mga dakop ug posibling ibulsa ang mga binulto sa illegal nga drugas.
Tungod niini, nimando si Vinluan nga kinahanglan kadtong mga pulis nga apil sa operation magkarsones og way bulsa.
Iyang giawhag ang mga police station commander nga rekisahon ang tanan niyang mga sakop nga apil sa anti-drug operations.
Kon adunay masakpan, nibahad si Vinluan nga iyang pasakaan og kaso ug ipataktak sa serbisyo ang tanang naglangkob sa operation apil na ang hepe niini.
“Para siguraduhin na walang maibulsa during police operations, I do recommend na kung pwede ang mga police natin pag nag operate walang bulsa ang kanilang mga pantalon o shorts na walang pwedeng ilagay,” matod ni Vinluan.
Sa iyang pag-asumer sa katungdanan, si Vinluan nihagit sa iyang station commanders sa pagsakmit og P1 billion nga balor sa illegal drugs.
Kini human ang iyang gipulihan nga si ret. Col. Royina Garma nisakmit og P700 milyunes nga shabu ubos sa iyang duha ka tuig nga pamunoan sa CCPO.
Hugot nga gihimakak ni Vinluan nga adunay pag recycle sa nasakmit nga illegal nga drugas. Taas ang iyang pagsalig sa iyang mga sakop nga dili kini himuon.
Nakita niya nga taas ang morale sa mga pulis sa Siyudad sa Sugbo.
Matod niya nga ang tanang drugas nga ilang makuha pipila ka gutlo human sa maimbentaryo nga gisaksihan sa media ug public official diretso sa kustodiya sa PNP Crime laboratory nga maoy gitahasan nga motago sa maong mga ebidensya.
Ang PNP Crime lab mohatag sa certification nga magpamatuod nga naa na sa ilang kustodiya ang mga ebidensya nga nakuha sa ilang mga dinakpan nga mao usab ang ilang ipresentar sa korte.