DALAGA nga giingong nakakiglalis sa iyang maguwang nga babaye kalabot sa iyang relasyon tali sa iyang boyfriend, nisaka sa usa ka cellular tower nga dunay gihabugon nga 50-80 metros.
Nilanat og mga upat ka oras ang operasyon, una pa nakombinser ang 17-anyos nga dalaga sa pagkanaug sa telecommunications (telco) tower sa Barangay Poblacion, lungsod sa Medellin, Sugbo sa Biyernes sa buntag, Septiyembre 27, 2019.
Si Police Corporal Marlon Montesclaros, duty investigator, niingon nga ang bayaw nga lalake sa dalaga maoy nitabang sa negusasyon inabagan sa pipila ka mga sakop sa Armed Forces of the Philippines (AFP).
“At about 10:50 am, we were able to assist her in going down from the top of the 50-80 meters high communications tower,” siya nagkanayon.
Gipapawong usab sa Lungsod sa Medellin ang kuryente agig panagana nga di maunsa ang dalaga nga gisuwayan pa pagluwas.
“Before ni nahitabo. Naa diay ni silay verbal argument kuno with her (elder) sister regarding sa iyang (17-year-old) boy friend. Gikan ni siya sa Cebu City. Ganahan ang iyang ate nga papaulion na siya sa Medellin,” asoy ni Montesclaros.
“At around 4:30 a.m. niabot sila sa Medellin unya nagbahad diay kuno ni siya nga naay mahitabo karong adlawa,” siya nidugang.
Ang lalis sa magsuon giingong nigrabe pag-abot sa Medellin.
Pipila ka concerned citizens nipahibawo sa kapulisan kalabot sa insidente.
Ilang nabantayan ang dalaga nga nisaka sa tower mga alas 6:45 sa buntag.
Nangabot usab ang mga ginikanan sa dapit samtang mga pulis, Bureau of Fire Protection ug Medellin Rescue Unit ningresponde.
Pag-abot sa ubos sa tower, dali siyang gidala sa Cebu Provincial Hospital sa Bogo City alang sa stress debriefing.