DI na ipadayon ang ban sa biseklita sa duha ka Mactan bridges. Apan ang mga siklista gikinahanglan nga moduot sa biseklita subay sa pedestrian lane sa duha ka mga daplin niini. Mao ni ang nakab-ot nga hukom sa Mactan-Cebu Bridge Management Board (MCBMB). Gitumbok sa board ang national law nga nagdili sa mga biseklita sa pag-agi sa mga taytayan.
Bisan uyon ko nga alang sa kaluwasan sa mga siklista kining mao nga lakang, pinasikad sa balaud, mahug ning kataw-anan. Kay kon tumanon ang balaud, sa ato pa ang mga siklista manganaug matag higayon nga motabok og mga taytayan, sama sa Mananga bridge ug Cansaga.
Di ra ba kay mao na nga mga taytayan ang tabukon, kadaghan pa ra ba dinhi sa Sugbo. Sa ato pa, kay naa may mga taytayan sa Butuanon River, labina sa amoa sa Bacayan, kaming mga siklista manganaug sab aron motabok sa taytayan?
Mas maayo tingali nga gamitong katarungan sa board ang kaluwasan sa mga siklista, labina niadtong wa sa endurance sports, ordinaryong mga siklista. Labaw na niadtong nagpraktis pag tungas samtang magsikad.
KANIADTO, KARON
Ako, akong misis ug mga bata nakasuroy sa Dakbayan sa Lapu-Lapu nga nagbisekllita pipila ka mga tuig na ang nakalabay. Nanuroy mi sa balay sa among higala sa Marigondon. Nanguli mi nga nagbiseklita taliwa sa kangitngit sa kagabhion.
Apan paglabay sa katuigan, akong naobserbahan ang kalainan sa kaniadto ug karon. Kaniadto, di pa kaayo daghan ang mga motorsiklo ug scooter. Apan samtang nagkabarato ang datahan sa mga motorsiklo ug scooter ug taliwa sa grabeng suliran sa trapiko, misanay ang mga two-wheeled nga sakyanan. Ang mga biseklita nga mao ray sagad tig filter kaniadto sa kilid sa dan, gipulihan na sa mechanized two-wheeled nga mga sakyanan.
Tingali gani, ang mga nagbiseklita kaniadto mibalhin na sa de makinang sakyanan. Alang nako, medyo kuyaw na ang duha ka bridges sa magbiseklita, labina daghan sa mga driver sa mga motor ug scooter nga hinanggaw og pinadaganan.
DI TINGALI TANAN
Bisan uyon ko sa panan-aw sa board nga ang kaluwasan maoy gitan-aw, maayo tingali nga dunay mga adlaw nga itugot ang pag bike sa duha ka bridges. Kanang weekend, labina Dominggo diin di kaayo taas ang volume sa mga sakyanan, itugot sa board ang pagtindak.
Mao ni ang mga adlaw nga kasagaran namong mga mahiligon sa biseklita, manindak tabok sa duha ka bridges. Sagad usab namo di hinay manaka sa duha ka mga taytayan, labina sa road bikers ug triathletes.
Mas maayong dunay mga adlaw nga exempted ang pagdili. Kay kon ihigpit gyud ni nga ipatuman ang balaud, unsaon na lang nang Ironman nga kada tuig nang gihimo. Hinaut pang huna-hunaon kini sa board.