SAMA sa publiko, si Cebu City Councilor Antonio Cuenco gustong masayod kon hain na ang illegal drugs gipanghipos human masakmit ang kinilo nga shabu sa mga raid sa nanglabay nga katuigan. Kinilo na gud ang nasakmit sa kapulisan.
Tungod sa kadagko na sa kantidad sa illegal drugs nga nasakmit ug ingon sa way hubashubas, daghan nang mga netizen nga nagduda nga recycled kining mga nasakmit. Pun-an pa sa pag-angkon sa Philippine National Police nga dunay ninja cops, pipila niini naa sa Central Visayas. Naa gani nadakpang pulis sa Cebu City Police Office (CCPO) nga nangbaligya sa shabu nga ilang nasakmit.
Di ni unang higayon nga ang konsehal nagpakitag interest sa illegal drugs. Si Cuenco ang amahan sa Comprehensive Dangerous Drugs Act of 2002. Kini human sa mga congressional hearing dinhi sa Dakbayan sa Sugbo kalabot sa giingong kalambigitan sa magsuong Peter ug Wellington Lim sa illegal drugs. Wa hinuon mapamatud-i ang mga alegasyon batok sa mga Lim bisan dunay mga saksi batok kanila.
Gusto ni Cuenco nga kinahanglan ipakita sa Philippine Drug Enforcement (PDEA), PNP, uban sa mga huwes, ang imbentaryo sa illegal drugs nga nasakmit sa nanglabay nga katuigan. Pinaagi niini, mawagtang ang mga pagduda sa publiko nga recycled nga shabu ang nasakmit sa mga police operation.
Di lang unta ang CCPO maoy mopakita, apil na ang Central Visayas PNP kay di ra baya dinhi ang kinilo nga shabu nga nakuha.
Taudtaud nang gihagit ang PDEA ug PNP sa pagpakita sa ilang imbentaryo sa illegal drugs, apan ingon sa nagpakabungol sila sa yangungu ug hagit sa publiko. Hayan, pinaagi ning hagit ni Cuenco kanila, isip amahan sa balaud batok sa illegal drugs, makombinser ang mga opisyal sa mao nga mga ahensya nga ilang ipakita ang shabu nga ilang nasakmit aron pagwagtang sa pagduda nga sila nang-recycle.