GRABING suki karon sa mga kongresista human gibonggo ni Senador Ping Lacson ang dakong pahat sa giduso sa Kongreso nga P4.1 trillion nga budget alang sa tuig 2020.
Lalim bay gigahinan og tag P1.5 bilyones nga pork barrel funds ang 22 ka mga deputy speaker sa Kongreso ug P700 milyones ang mga ordinaryong kongresista, matod pa ni Sen. Lacson.
Kon buot hunahunaon, grabing protesta sa katawhan lakip na sa simbahan batok sa pork barrel funds sa Kongreso ug sa DAP sa Malakanyang kaniadtong panahon pa ni Presidente Aquino.
Nakahibawo na man kita nga kining pork barrel maoy tinubdan sa pangurakot sa mga ordinaryong mga kongresista. Duna man silay gitawag og SOP sa mga proyekto nga ilang mabuhat gamit ang ilang pork barrel funds.
Gani, dunay pahat sa SOP ang mga lider sa kongresista nga maagi-an sa maong proyekto.
Dihang gisuwayan pagbanhaw sa miaging Kongreso ubos ni kanhi Speaker Gloria Macapagal-Arroyo ang pork barrel, niresulta kini sa pag-veto ni Presidente Rodrigo Duterte sa maong budget ug pagkadelatar sa approval sa maong 2019 budget.
Dako ang negatibong epekto niining maong kalamboan diha sa atong ekonomiya.
Abi gyud nako nga nakat-on na ang mga kongresista nga dili na kini buhaton pa. Unsa bang pagka-unsa-a nga giusab na man sab nila. Gipadak-an pa gani.
Samtang nagpasalamat kita kang Sen. Lacson sa pagbonggo niini, grabing kasuko ang gipadayag sa pipila ka mga sakop sa Kongreso.
MAG-PRESIDENTE?
Sayo pa kaayo unta nga maghisgot kita karon kon si kinsay interesado modagan sa pagka presidente karong 2022. Apan lahi man ang panahon karon.
Sa miaging kampanya sa Mayo 2019, gihugonhugon na man nga si Mayor Inday Sara Duterte modagan pagka presidente mao nga nagtukod sab kini og Hugpong sa Pagbabago nga nagtukod og nasudnong network sa mga grassroots supporters.
Karong bag-o, gihisgutan sab ni Presidente Duterte nga si Sen. Lacson interesado sab modagan. Nakapamuntos man kini si Lacson sa iyang pagbunggo sa mga isyo sama sa pork barrel ug kining higanteng anomaliya diha sa Bureau of Corrections (BuCor).
Samtang makaulaw ang maong isyu alang sa administrasyon, nakahatag kini og nasudnong atensyon kang Sen. Lacson nga hugot mobatok sa pangurakot.
TRAPIK
Daghan ang moingon nga pareho na sa Manila ang trapik sa Sugbo. Hmmm. Gikan lang ko didto sa kaulohan ug makaingon ko nga doblehon pa ang trapik didto. Lalim bay nisakay mi sa akong anak og Grab gikan sa NAIA 2 padulong sa SM Aura diha sa BGC mga alas 5:30 sa hapon. Niabot mi 7:30 na.
Duha ka oras ming naa sa dalan. Ug niingon ang akong mga kaila nga mas nigrabi pa ang trapik sa miaging mga bulan. (@anol_cebu sa Twitter)