ADUNAY lugar sa Inayawan Landfill nga kanunayng gaaso kay sa ilalom adunay gaagipo. Walay pagkapalong. Sa habagatan sa Karaang Siyudad sa Jerusalem adunay walog nga gitawag og Gehenna. Gikan kini sa duha ka pulong sa Hebreo nga nagkanayon, “walog ni Hinnom”. Ang Hinnom ngalan sa tawo. Kaniadto kuno sa panahon ni Jesus kining walog kanunay sad nga gaaso kay may gaagipo. May moingon pa gani nga sa maong walog gigamit sa paghimo og “child sacrifice” ngadto sa mga diosdios sa dihang may mga Judio nga natakdan sa mga pagano kansang pagtuo milakip sa paghalad og “child sacrifice”. Sunogon pod ang bata nga gihalad.
“Hades” ang pulong nga gigamit sa ebanghelyo ni Lucas. Lahi kini sa “Gehenna” kay ang gipasabot sa Hades mao ang luna sa mga patay nga anaa sa ilalom sa yuta. Apan may gisulti ang sapian nga namatay ug naabot sa Hades nga “Amahan kong Abraham, kaloy-i intawon ako ug ipadala si Lazaro aron pagtuslob sa tumoy sa iyang tudlo sa tubig ug mabugnawan ang akong dila, kay hilabihan ang akong pag-antos niining nagdilaab nga kalayo”.
Mora man nig Gehenna o, sa ato pang pinulongan, impiyerno ang naabtan sa maong tawo nga nagpunay og hangyo. Gani sa dihang gihangyo niya si Abraham sa pagpadala ni Lazaro aron mabugnawan iyang dila, miingon si Abraham nga may “dakong bung-aw” nga babag sa pagtabok gikan kang Abraham ngadto sa Hades. Kon giunsa pagpalayo sa sapiang tawo kang Lazaro sa buhi pa sila, mao say gilay-on sa bung-aw nga buwag sa sapiang tawo kang Lazaro.
Luho kaayo ang kinabuhi sa mga sapian sumala ni propeta Amos. Lalim mo na ang ilang mga katulganan gikan pa sa garing nga bangkil sa elepante! Wala na sila manumbaling sa mga panghitabo nga katilingbanon. Anaa sila sa ilang kaugalingong kalibotan. Ang kinaiyang waypagpakabana nakapaandar sa kasuko sa Dios.
Ang tambal sa espirituhanong sakit sa mga wala magpakabana mao ang tambag nga gihatag ni Pablo ngadto kang Timoteo: “Apan ikaw, tawo sa Dios, pangitaa ang pagkamatarong, debosyon, pagtuo, pailob, ug kalumo.” Kining mga hiyas, kinaiya sa diosnong tawo nga maantigong magpakabana.
Tinuod angayan lamang kitang mahadlok nga maadto sa impiyerno kay ang bung-aw didto misimbolo lamang sa bung-aw nga ato nang gitukod samtang buhi pa kita. Bung-aw sa kahakog nga makaminos sa uban ilabina sa mga pobre. Dili sayon alagaran ang pobre kay, sa pulong pa sa usa ka santo nga “masayran ninyo nga ang gugma sa uban usa ka bug-at nga pasanonon, mas bug-at pa kaysa kaldero sa sabaw ug usa ka puno nga bukag. Apan magpabilin kamo sa inyo pagkamalumo ug sa inyong pagpahiyom. Dili paigo nga mohatag lamang og sabaw ug pan.” Mao kini ang makapalangit.
Gadilaab pa ba ang atong gugma sa mga kabos o aso na lamang ang nahabilin?