GIPASABOT sa Samahang Basketbol ng Pilipinas (SBP) nga gumikan sa ka mubo sa panahon, maglisod na si naturalized player Andray Blatche sa paghangop sa bag-ong sestima nga pagasubayon sa Gilas Pilipinas alang sa kampanya niini sa 2019 Southeast Asian Games.
Mao kini usa sa mga rason nga wala na gikuha sa SBP si Blatche alang sa matag duha ka mga tuig nga kompetisyon nga ipahigayon sa Pilipinas sugod karong Nobiyembre 30.
Ang SBP mingkuha og mga beterano sa Philippine Basketball Association (PBA) aron molangkob sa Gilas Pilipinas nga giyahan na ni Brgy. Ginebra Gin Kings coach Tim Cone.
“SEA Games hindi na. We’re going all-Filipino, yun ang sinabi ni coach Tim,” pasabot ni SBP president Al Panlilio.
“Again we have to understand the short preparation time and the system of coach Tim.”
Si Blatche wala pa sukad nakaduwa sa Gilas Pilipinas alang sa SEA Games.
Ang Pilipinas mao labing dominante sa natad sa basketball sa Southeast Asia.
Apan ning higayuna, nagkalig-on na ang ubang teams hinungdan nga wala mikompiyansa si Cone. (ESL)