KASONG murder ang gipasaka nga kaso batok sa gitudlong primary suspect sa pagdunggab-patay sa usa ka 32-anyos, didto sa Kasilak, Barangay 76-A, Bucana, Davao City, Biyernes sa kaadlawon, Septyembre 27.
Subay sa blotter nga natala sa San Pedro PNP ang gitudlong nag-unang suspek mao si Jihad Saman Galanto, 19-anyos, taga Dapsa, Saint John, Bucana.
Bisan pa man niini, gilimod sa suspek ang pasangil nga maoy mipatay kang Jericho Nacar Funcion kinsa giingong nagdula og mobile legends kilid sa kalsada sa Kasilak.
“Dili man gyud ako ang nagdunggab, naa lang ko sa dapit, tapos pagdinaganay, ako ang naapsan, nabunalan pa man gani akong ulo, mao ning nagkadugo akong kamot,” ingon sa suspek nga si Galanto.
Anaa sab sa kustodiya sa Davao City Social Services and Development Office-Quick Response Team for Children’s Concern (CSSDO-QRTCC) ang duha ka mga menor de edad kinsa na-rescue sa mga pulis atol sa dinaganay sa paggukod sa mga midunggab.
“Wala ko kaila anang mga nadakpan nga minor,” ingon ni Galanto kinsa una nang giingon nga ang duha ka menor de edad maoy ilang mga kaubanan sa pito ka mga mitabang og kulata sa biktima una natigayon ang pagpanunggab.
Padayong naghimo og manhunt operation ang kapulisan sa San Pedro PNP batok sa uban pang mga suspek sa krimen. (Jeepy P. Compio)