GIPAABOT nga di maparalisar ang kinatibuk-ang pampublikong transportasyon sa Metro Cebu karong Lunes bisan kon molusad og tulo ka oras nga lihok protesta ang Pinagkaisang Samahan ng mga Tsuper at Operators Nationwide (PISTON).
Ang mga sakop sa Piston Cebu chapter mohimo’g rally agig pagsuporta sa panawagan sa Alliance of Concerned Transport Organization (ACTO) ug sa ilang mother organization.
Apan sa mga transport group dinhi sa Sugbo, ang Piston ra ang nipahibawo nga mosalmot sa kalihukan sa Lunes, Septiyembre 30.
Matod ni Greg Perez, pangulo sa Piston Cebu, nga di momenus 200 ka mga sakop nila ang mosalmot sa tulo ka oras nga picket o rally atubangan sa Land Transportation Franchising and Regulatory Board (LTFRB-7).
Magtagbo sila sa alas 8 sa buntag atubangan sa usa ka mall dayon dungan nga momartsa padung sa atubangan sa Land Transportation Franchising and Regulatory Board (LTFRB) 7 aron mopadangat sa ilang mga yangungo.
Nipadala og mga sulat imbetasyon ang Piston ngadto sa ubang mga transport group sa Sugbo aron sa pagsalmot.
Hinuon, iyang giklaro nga ang ilang grupo di mamugos sa mga ubang mga drayber ug operator nga mosalmot.
Apan di usab sila mopakgang sa mga drayber nga mohunong og pipila ka oras nga pagpamasahero ug mouban sa ilang rally.
“Five percent sa among grupo, sa mga yanong driver nga nag-abang, apektado gyud, kay nakuhaan na og pasahero kay adto na sa Beep mosakay. Naa pang Sugbo tours, My Bus, People’s Coop. Dakung kibhang sa ilang kinitaan. Naay mga na-phase out na sa atong mga gagmay nga operators,” tug-an ni Perez sa Superbalita Cebu.
“If sa una tag P1000 ang adlaw, karon pinakataas na ang P500 to P700 ang kita. Unya tungaan pa sa driver ug konduktor. Maabot pa gyud na dapat 10 to 12 rounds sila, nga sa una 8 rounds ra,” dugang sa pangulo sa Piston Cebu.
Usa sa ilang gisakitan nga nakatampo nga gihulagway nila nga gitumban na sila pagmaayo, mao ang dakong pagsaka sa presyo sa lana.
Sa habig sa Siyudad sa Talisay, matod ni Jonathan Tumulak, pangulo sa City of Talisay Traffic Operations Development Authority (CT-TODA), nga mag-monitor sila sa traffic situation karong Lunes, Septiyembre 30.
Hinuon, wa pa silay nadunggan nga transport group sa Talisay City nga mohunong sa pagpamasahero.
Gitug-an ni Tumulak, nga ang kagamhanan sa Talisay City, ilabi na si Mayor Gerald Anthony Gullas Jr. ang morespeto sa baruganan sa mga driver ug operator.
Apan kahibalo usab sila nga nakasabot ang maong transport group kon unsa ang public service, ug nga dili maayo nga masakripisyo ang publiko tungod sa ilang mga yangungo.
Aduna na usab giandam nga mga contingency plan ang kagamhanan kon ugaling adunay di mamasahero ug ma-stranded ang libuan ka mga pasahero sa Siyudad sa Talisay.
Samtang si Ryan Benjamin Yu sa Cebu Integrated Transport Service Multi-purpose Cooperative (CITRASCO), niingon nga di sila mosalmot sa transport strike karong Lunes.
Ila hinuong gitahod ang katungod sa Piston.
Nipasalig usab ang Cebu Provincial Bus Operators Association (CPBOA) nga mopakatap sila og mga bus sa Siyudad sa Sugbo kon dunay pagkuwang sa transportasyon. Lima ang ilang reserba, matod sa ilang pangulo nga si Barili Councilor Julie Flores. / Dugang taho ni WBS