Frasco midusog balaudnon alang sa mga isla sa Camotes

ARON mapalambo ug makaangkon og mga ekonomikanhong oportunidad ang mga lumolupyo sa mga isla sa Camotes, si Cebu 5th district Representative Vincent “Duke” Frasco miduso og balaudnon nga maglibkas sa Mangrove Swamps Forest Reserves declaration alang sa mga isla sa Poro, Pacijan, ug Ponson.

Tumong ini nga ang tipik sa kayutaan niining mao nga mga isla mahimo nang alienable ug disposable lands. Kini naglangkob sa mga lungsod sa San Francisco, Tudela, Poro ug Pilar.

Ang House Bill No. 4785 giduso ngadto sa Ubos Balay Balauranan alang sa unang pagbasa ug gi-refer ngadto sa House of Representatives committee on natural resources nga gipangulohan ni Rep. Elpidio Barzaga, Jr.

Sa iyang proposal, si Frasco nitumbok nga dunay “legal, economic and holistic justifications” alang sa di pag-apil sa mama'a nga kayutaan sa mga isla sa Camotes gikan sa classification isip mangrove swamp forest reserves.

“The people of the islands have been deprived from developing their economy, attracting developers and investors, and getting what they rightfully deserve,” matod ni Frasco sa iyang balaudnon nga giduso.

Ang upat ka mga lungsod sa Camotes tipik sa fifth district sa Sugbo, nga girepresentahan ni Frasco sa Ubos Balay Balauranan.

Kon kini mapasar, napanglantawan nga makapalambo kini sa ekonomiya sa upat ka mga lungsod.

Makabenipisyo usab niini ang populasyon nga moabot og 102, 996 sumala sa census niadtong 2015 kay ila nang mapatitulohan ug mabaligya ang ilang luna kon gusto sila.

Ang balaudnon hinuon ni Frasco wa maglakip sa kabakhawan nga nagkonektar sa mga lungsod sa San Francisco ug Poro.

Ang nagpugong sa mga lumolupyo sa paggamit sa ilang mga katungod isip mga tag-iya sa yuta mao ang Presidential Proclamation 2152 ni anhing Presidente Ferdinand Marcos nga giluwatan niadtong Disyembre 20, 1981.

“Sa dugay na nga panahon, ang mga lumulopyo sa Camotes wala nakatagamtam og igong kalamboan tungod kay dili mabaligya o matitulohan ang ilang mga yuta. Pinaagi niining balaodnon, aduna nay paglaum nga moangat ang ekonomiya sa Camotes,” matod ni Frasco. (PR)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph